OMBUDSMAN RUMINİYA NÜMAYƏNDƏ HEYƏTİ İLƏ GÖRÜŞMÜŞDÜR
Azərbaycan Respublikasının İnsan Hüquqları üzrə Müvəkkili (Ombudsman) Elmira Süleymanova Rumıniya İnsan Hüquqlarının Müdafiəsi Təşkilatının (OADO) nümayəndə heyəti ilə görüşmüşdür.
Ombudsman Aparatından AZƏRTAC-ın müxbirinə bildirmişlər ki, təşkilatın sədri Florentin Skaletski Ermənistanın təcavüzü nəticəsində didərgin düşmüş qaçqın və məcburi köçkünlərin vəziyyəti ilə maraqlanmışdır. Bakıya səfərdən məqsəd müşahidə etdiklərini beynəlxalq ictimaiyyətə, müvafiq təşkilatlara çatdırmaqdır.
E. Süleymanova Ombudsman Aparatının Qaçqınların və məcburi köçkünlərin hüquqlarının müdafiəsi şöbəsinin fəaliyyətindən danışaraq demişdir ki, qaçqın və məcburi köçkünlər uzun müddətdir ağır şəraitdə yaşayır, mənzil, əmək, mülkiyyət, sağlamlıq, təhsil hüquqlarından faydalana bilmirlər.
Eyni zamanda vurğulanmışdır ki, qaçqın və məcburi köçkünlərin vəziyyətinin yaxşılaşdırılmasına və sosial problemlərinin həllinə yönəlmiş qanunlar, Prezidentin fərman və sərəncamları, habelə, Milli Fəaliyyət Planı qəbul edilmişdir və həyata keçirilməkdədir. Bu məqsədlər üçün Neft Fondundan 74 milyon dollar vəsait ayrılmış, yeni evlər tikilmiş, qəsəbələr salınmış və yüzlərlə ailə çadırlardan, vaqonlardan həmin evlərə köçürülmüşdür.
E.Süleymanova demişdir ki, rəsmi məlumata görə, hərbi əməliyyatlar zamanı ermənilər beynəlxalq qanunları və konvensiyaları pozaraq, 5000-dən çox silahsız, dinc əhalini, əsasən, qadınları, uşaqları, ahılları əsir və girov götürmüşlər. Onlardan 783-ü indiyədək əsirlikdədir. Azərbaycan tərəfinin təkidinə baxmayaraq, ermənilər onları qaytarmırlar.
F.Skaletski aldığı məlumatlardan razı qaldığını bildirmiş və insanların pozulmuş hüquqlarının bərpasında Ombudsmana uğurlar arzulamışdır.
Görüşün sonunda Ombudsmana təşkilatın medalı təqdim olunmuşdur.
Bölmənin digər xəbərləri
