OMBUDSMANIN 2004-CÜ İL ÜZRƏ İLLİK MƏRUZƏSİ TƏQDIM EDİLMİŞDIR
AZƏRTAC xəbər verir ki, “Azərbaycan Respublikasının insan hüquqları üzrə müvəkkili (ombudsman) haqqında” Azərbaycan Respublikası Konstitusiya Qanununun 14-cü maddəsinə əsasən, ombudsman Elmira Süleymanovanın “Azərbaycanda insan hüquqlarının və azadlıqlarının təmin edilməsi və müdafiəsinin vəziyyəti haqqında” 2004-cü il üzrə illik məruzəsi 2005-ci il fevralın 28-də Azərbaycan Respublikasının Prezidenti İlham Əliyevə və Milli Məclisə təqdim edilmişdir.
İllik məruzə qanunvericiliklə müəyyən edilmiş qaydada Nazirlər Kabinetinə, Konstitusiya Məhkəməsinə, Ali Məhkəməyə və Baş Prokurora da göndəriləcəkdir.
Məruzə Milli Məclisin yaz sessiyasında dinlənildikdən sonra geniş ictimaiyyətin tanış olması məqsədi ilə dərc edilmək üçün kütləvi informasiya vasitələrinə, o cümlədən “Azərbaycan” qəzetinə və “Azərbaycan Respublikasının Qanunvericilik Toplusu”na təqdim olunacaqdır.
Məruzədə ombudsmanın insan hüquq və azadlıqlarının müdafiəsi sahəsində fəaliyyətinin, hüquqi maarifləndirmə və elmi-analitik işinin nəticələri, onun ictimaiyyətlə və kütləvi informasiya vasitələri ilə əməkdaşlığı, beynəlxalq əlaqələri, həmçinin insan hüquq və azadlıqlarının daha etibarlı təmin edilməsinə yönəlmiş, o cümlədən qanunvericiliyə dəyişikliklərə dair ümumiləşdirilmiş təklif və tövsiyələri əksini tapmışdır.
Bölmənin digər xəbərləri
