Bakı, 30 aprel, Günel Alıyeva, AZƏRTAC

AZƏRTAC Azərbaycanın gənc istedadları ilə müsahibələr silsiləsini davam etdirir. Növbəti həmsöhbətimiz Bakıdakı 201 nömrəli tam orta məktəbin 10-cu sinif şagirdi Ömərxəyyam Cəfərlidir. Hələ erkən uşaqlıq illərində diqqəti özünə cəlb edən Ömərxəyyam məntiq sahəsində qeyri-adi qabiliyyətlərini nümayiş etdirib. Müxtəlif olimpiadalarda, o cümlədən “Kenquru” yarışlarında və beynəlxalq turnirlərdə iştirak onun bu sahəyə marağını daha da artırırdı.

Həmsöhbətimizin sözlərinə görə, o, 13 yaşından müxtəlif mövzularda tədbirlərdə iştirak etməyə başlayıb və o vaxtdan özünü təkmilləşdirmək üçün bütün imkanlardan fəal şəkildə istifadə edir. Bundan əlavə, bu illər ərzində müxtəlif dövlət qurumlarının rəhbərləri ilə görüşməyə nail olub, dəfələrlə təşəbbüs göstərib və müxtəlif layihələrdə iştirakını təklif edib: “Mənim üçün bu tədbirlər həm özünü reallaşdırmaq, həm də müxtəlif sahələrdə praktiki bacarıqlara yiyələnmək baxımından dəyərli təcrübəyə çevrilib. Hazırda məktəbimizdə fəaliyyət göstərən “Gənc diplomatlar” komandasının sədriyəm. Şagirdlərlə birlikdə müxtəlif ideyalar irəli sürür və onların həyata keçirilməsi üzərində işləyirik. Bu, mənə liderlik bacarıqlarını inkişaf etdirmək, tələbələr arasında əməkdaşlığı təşviq etmək və cəmiyyətə fayda vermək imkanı yaradır”.

O, həmçinin qeyd edib ki, məktəbdə Kiçik Akademiyanın sədri kimi şagirdlərə fənlər üzrə elmi-tədqiqat işlərinin hazırlanmasında və təqdim olunmasında köməklik edir: “Mənim üçün bu, sadəcə bir vəzifə deyil, liderlik və təşkilatçılıq bacarıqlarımı inkişaf etdirmək üçün unikal imkandır. Üzərimə daha çox məsuliyyət götürərək, bu fürsətdən maksimum yararlanmağa çalışıram”.

Bundan əlavə, Ömərxəyyam “MeetNextGen” adlı yeni komanda yaradıb. Onun tərkibində ölkənin müxtəlif bölgələrindən olan gənclər yeni ideyalar və layihələr üzərində birgə fəaliyyət göstərmək üçün bir araya gəlirlər: O qeyd edir: “Məqsədimiz ölkənin gələcəyi üçün faydalı olmaq, gənclərin səsini çatdırmaq və cəmiyyətin inkişafına töhfə verməkdir”.

Ömərxəyyamın sözlərinə görə, “MeetNextGen” komandasının yaradılması ideyası məktəb təşəbbüsləri çərçivəsindən kənara çıxmaq və ölkənin hər yerindən olan fəal gəncləri birləşdirmək istəyindən yaranıb: “Əvvəlcə gənc diplomatlar komandası yalnız məktəbdaxili layihə idi. Lakin mənə elə gəldi ki, bu, kifayət deyil. Düşündüm ki, niyə regionlardan gəncləri bu işə cəlb etməyək? “MeetNextGen” komandası da belə yarandı. İndi burada Azərbaycanın müxtəlif bölgələrindən olan gənc oğlan və qızlar birləşiblər. Biz yeni ideyalar üzərində işləyirik, gənclər arasında ictimai fəallığı inkişaf etdiririk və onları ictimai təşəbbüslərə cəlb edirik. Bu yaxınlarda yeni sədr seçdik, indi mən sədr müavini kimi fəaliyyət göstərirəm, komandanın inkişafına dəstək verməyə davam edirəm”.

Şagirdin sözlərinə görə, onun müxtəlif layihələrdə iştiraka marağı ibtidai sinifdən yaranıb. O, xatırlayır ki, bir gün Azərbaycan dili və ədəbiyyat müəllimi Afət Xəlilova ondan bir şagirdin layihəsini kompüterə yükləməyi xahiş edib. Sadə görünən bu epizod dönüş nöqtəsi oldu: “Həmin vaxt məndə maraq yarandı: bu nə cür layihədir, necə həyata keçirilib? Onun yolunu öyrənməyə başladım və başa düşdüm ki, mən də bu yolda özümü sınamaq istəyirəm. Ətrafımda olan məqsədyönlü, daim öz üzərində işləyən insanlar mənə ilham verirdi. Mən də belə olmaq istədim. Cəmi 16 yaşım olsa da, könüllülük təşəbbüslərində iştirak etmək, faydalı olmaq üçün hər fürsətdən yararlanmağa çalışıram”.

Bir neçə məsul vəzifənin birləşdirilməsindən danışan Ömərxəyyam vurğulayır ki, eyni zamanda, məktəbdə həm “Gənc diplomatlar” komandasının, həm də Kiçik Akademiyanın sədri olmaq nizam-intizam və fədakarlıq tələb edən böyük işdir. O əlavə edir: “Təhsili, hazırlıq kurslarını və bu cür irimiqyaslı layihələrdə iştirakı birləşdirmək həqiqətən çətindir. Lakin zaman keçdikcə aydın bir ritm qurmağı bacardım. Komandada işləmək mənə böyük zövq verir. Mən mühüm ünsiyyət bacarıqları əldə etdim, effektiv əlaqələr qurmağı və insanları daha yaxşı başa düşməyi öyrəndim. Bu, mənə təkcə təhsil mühitində deyil, həm də şəxsi inkişafımda kömək etdi”.

Şagirdin fikrincə, əsl lider hər kəsdə dəyər görməyi bacaran, hörmətə əsaslanan münasibətlər qurmağı və bərabərlik mühiti yaratmağı bilən şəxsdir.

Onun inkişafında yüksəkvəzifəli şəxslərlə görüşlər xüsusi yer tutur. Yaşının az olmasına baxmayaraq, Ömərxəyyam özü təşəbbüs göstərir və görüşlə bağlı müraciət edir, ideyalarını təqdim etməyə və müvafiq layihələrdə iştirak etmək istəyini bildirməyə çalışır: “Bəziləri razılaşır və məni öz işlərinə cəlb edir. Digərləri isə alternativ yollar təklif edir və gələcək inkişafla bağlı məsləhətlər verir. Könüllülük layihələrində iştirak etmək mənə xüsusilə maraqlıdır. Məsələn, mən bu yaxınlarda Azərbaycanın ombudsmanı Səbinə Əliyeva ilə görüşdüm. İnsan hüquqları mövzusuna marağımdan danışdım və bir neçə sual verdim. Səbinə xanım mənə aktual mövzuda məqalə yazmağı məsləhət gördü. Hazırda bu mətn üzərində işləyirəm. O, insan hüquqlarına həsr olunacaq”.

Ömərxəyyamın beynəlxalq münasibətlərə marağı uşaqlıqdan yaranıb. O, xəbərləri maraqla izləyib, dövlət xadimlərinin fəaliyyətini müşahidə edib və gələcəyini məhz diplomatiya ilə bağlamaq istədiyini tədricən dərk etməyə başlayıb: “Mənim bu sahədən həmişə xoşum gəlib. Ölkəmi təmsil etmək, beynəlxalq danışıqlarda iştirak etmək və Vətənimin maraqlarını qlobal müstəvidə müdafiə etmək ideyası məni cəlb edib”.

Məktəbli onun daim fəal olmasının səbəbi ilə bağlı suala əminliklə cavab verir: “Ətrafımda olan insanlar məni ruhlandırır. Hara gedirəmsə, hansı layihədə iştirak edirəmsə, həmişə dəstək hiss edirəm. Bu yolda mənə dəstək olan ailəmə dərin minnətdarlığımı bildirmək istəyirəm. Onlar həmişə mənim yanımda olublar və əsas köməkçilərimə, ilham mənbəyimə çevriliblər. Məktəbimə və müəllimlərimə də minnətdaram. Nailiyyətlərimdə onların əməyi çox böyükdür. Onlar mənə təkcə akademik biliklər verməyib, həm də həyatda uğur qazanmaq üçün çalışmağı öyrədiblər”.

Gələcəyini planlaşdıran Ömərxəyyam artıq növbəti beş il üçün üç prioritet müəyyənləşdirib: keyfiyyətli təhsil almaq, peşəkar inkişaf üçün təcrübə keçmək və seçdiyi sahədə yeni zirvələrə çatmaq. O inanır ki, əzm və işinə sədaqət onu mütləq uğura aparacaq. Gələcəkdə beynəlxalq münasibətlər ixtisası üzrə xaricdə təhsil almağı və diplomat olmağı planlaşdırır. O, bu məqsədlə siyasi prosesləri yaxından izləyir və qlobal problemlərə dair biliklərini fəal şəkildə genişləndirir.