“ORTA ƏSR ƏCZAÇILIQ TERMİNLƏRİ LÜĞƏTİ”
Azərbaycan Milli Elmlər Akademiyasının Məhəmməd Füzuli adına Əlyazmalar İnstitutu tarix elmləri doktoru, biologiya elmləri namizədi Fərid Ələkbərovun “Orta əsr əczaçılıq terminləri lüğəti”ni nəşr etmişdir.
Kitabda əczaçılığa dair 1000-dən çox terminin Azərbaycan, rus, latın dillərinə tərcüməsi və qısa izahı verilmişdir.
Orta əsr türk, ərəb və fars əczaçılıq terminləri həmin dillərdəki müasir terminlərdən fərqlənir. Həmin dövrdə müsəlman şərqində istifadə edilən tibb və əczaçılıq terminləri bu üç dildən, habelə qədim yunan, hind, Çin, latın, yəhudi, Suriya və s. dillərdən alınmışdır.
Kitabda ərəb əlifbası sırası ilə verilmiş terminlərin hansı dilə mənsub olduğu göstərilmişdir. Dərman bitkilərinin elmi adları isə latın dilində verilmişdir ki, bu da mütəxəssislər üçün çox əhəmiyyətlidir.
Orta əsrlərdə Azərbaycanda işlədilən əczaçılıq terminlərinə aid ilk nəşr olan bu kitabın elmi redaktoru filologiya elmləri namizədi Məmməd Adilov, rəyçisi əczaçılıq elmləri doktoru, professor Yusif Kərimovdur.
Bölmənin digər xəbərləri
