“Orta ümumtəhsil məktəblərində riyazi təhsilin fəlsəfəsi, didaktikası, həyatakeçirilmə texnologiyası” dərsliyi çapdan çıxıb
Bakı, 9 aprel, AZƏRTAC
Azərbaycan Milli Elmlər Akademiyasının (AMEA) Şəki Regional Elmi Mərkəzinin baş elmi işçisi, professor Firədun İbrahimovun “Orta ümumtəhsil məktəblərində riyazi təhsilin fəlsəfəsi, didaktikası, həyatakeçirilmə texnologiyası” dərs vəsaiti işıq üzü görüb.
AMEA-dan AZƏRTAC-a bildiriblər ki, dərs vəsaitində XXI əsrin çağırışları və bu çağırışlara adaptasiya oluna bilən şəxsiyyətin keyfiyyətləri, təhsilin həyata keçirilməsinin fəlsəfi, məntiqi, psixoloji, didaktik əsasları, ümumtəhsil sistemində riyazi təhsilin mövqeyi, riyazi bilik, bacarıq, vərdişlərin ötürülməsinin nəzəriyyə və texnologiyasının inkişaf səviyyəsi oxucuya təqdim olunur.
Bundan əlavə, riyazi anlayışların və onların formalaşması prosesinin təbiəti açılır, təriflərin öyrədilməsi yoluna aydınlıq gətirilir, hökm, aksiom, teorem anlayışlarına elmi şərhlər verilir. Dərslikdə sual, məsələ və digər növ tapşırıqların riyaziyyatın tədrisində mühüm vasitə olduğu əsaslandırılır, təlimin metodlarına, onların nomenklaturası və təsnifatına elmi şərhlər verilir, real pedaqoji prosesə daxil edilməsi yolları işıqlandırılır.
Dərs vəsaiti riyaziyyat və informatika müəllimliyi ixtisasları üzrə təhsil alan tələbələr, magistrantlar və doktorantlar, o cümlədən ümumtəhsil məktəblərində işləyən riyaziyyat müəllimləri üçün nəzərdə tutulub.
Bölmənin digər xəbərləri
