“Osaka 2025” sərgisinin 25 milyon ziyarətçisi olub
Pekin, 13 oktyabr, AZƏRTAC
Yaponiyanın Osaka şəhərində “Həyatımız üçün gələcək cəmiyyəti formalaşdıraq” (Designing the Future Society for Our Lives) mövzusunda keçirilən “Ekspo 2025” sərgisi başa çatıb.
AZƏRTAC xəbər verir ki, oktyabrın 13-də sərginin bağlanış mərasimi keçirilib. Tədbirdə Yaponiyanın vəliəhd şahzadəsi Akişino, Baş nazir Şiqeru İşiba, xarici qonaqlar iştirak ediblər.
Təşkilat komitəsinin məlumatına görə, 6 ay davam edən sərgini təxmini 25 milyon insan ziyarət edib. Növbəti ekspo 2030-cu ildə Səudiyyə Ərəbistanının Riyad şəhərində keçiriləcək.
Qeyd edək ki, aprelin 13-də başlayan “Osaka Ekspo 2025”də 158 ölkə təmsil olunub. Heydər Əliyev Mərkəzinin təşkilatçılığı ilə yaradılan Azərbaycan milli pavilyonu “Ekspo 2025”in “Həyatları əlaqələndirmək” (“Connecting Lives”) bölməsində yerləşməklə “Dayanıqlı inkişafa doğru yeddi körpü” (“Seven bridges for sustainability”) mövzusunu əhatə edib. Pavilyonun konsepsiyası dahi Azərbaycan şairi və mütəfəkkiri Nizami Gəncəvinin “Yeddi gözəl” poemasından qaynaqlanıb. Burada Azərbaycanın zəngin mədəni irsi, texnoloji inkişaf və davamlı inkişafa bağlılığı, eyni zamanda, dialoqa açıqlığı nümayiş olunub. Pavilyonda Azərbaycan və Yaponiyanı tərənnüm edən “Dostluq ağacı” da yer alıb. Sərgi çərçivəsində iyunun 5-də Azərbaycan Milli Günü keçirilib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
