ÖTƏN DƏRS İLİNİN YEKUNLARI VƏ QARŞIDA DURAN VƏZİFƏLƏR MÜZAKİRƏ EDİLMİŞDİR

04.09.2004 [14:27]
Çap et
A⁺ A^-

AZƏRTAC-ın müxbiri xəbər verir ki, Suraxanı rayon təhsil işçilərinin konfransında rayon təhsil şöbəsinin müdiri Fərhad Həsənov 2003-2004-cü dərs ilinin yekunları və təhsilin müasir yanaşmalar əsasında inkişaf etdirilməsi sahəsində qarşıda duran vəzifələrdən danışmışdır. Ötən dərs ilində qazanılmış uğurlardan bəhs edən natiq vurğulamışdır ki, bu il test imtahanlarında iştirak etmiş 3 min 74 nəfər məzunlardan 2 min 425 nəfəri sənəd vermiş və onlardan 1065 nəfəri tələbə adını qazanmışdır.

Təhsil nazirinin müavini Elmar Qasımov çıxış edərək Prezident İlham Əliyevin “Azərbaycan Respublikasında “Bilik günü”nün təsis edilməsi və təhsil müəssisələrində iş rejiminin tənzimlənməsi haqqında” Fərmanının və “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramının (2005-2007–ci illər) təsdiq edilməsi haqqında” Sərəncamının əhəmiyyətindən danışmışdır.

Konfransda təhsil islahatlarının uğurla həyata keçirilməsi üçün məktəblərin maddi-texniki bazasının möhkəmləndirilməsi, şagirdlərin intellektual səviyyəsinin yüksəldilməsi və digər məsələlər geniş müzakirə edilmişdir.

Şagirdlərin təlim-tərbiyyəsində fərqlənən müəllimlərə mükafatlar verilmişdir.

Konfrans iştirakçıları Prezident İlham Əliyevə müraciət qəbul etmişlər.