ÖTƏN İL BAKI ELEKTRİK STANSİYASI ELEKTRİK ENERJİSİ İSTEHSALI PROQNOZUNU 15 FAİZ ÜSTƏLƏMİŞDİR
AZƏRTAC “Azərenerji” Açıq Səhmdar Cəmiyyətinin mətbuat xidmətinə istinadla xəbər verir ki, Bakı Elektrik Stansiyası normal iş rejimində fəaliyyətini davam etdirir.
Ötən il ərzində stansiyada 476 milyon kilovat-saat elektrik enerjisi istehsal edilmişdir. Bu, nəzərdə tutulduğundan 62 milyon kilovat-saat çoxdur.
Həmin müddətdə hər kilovat-saat elektrik enerjisi istehsalına proqnozlaşdırıldığından az şərti yanacaq sərf edilmişdir. Nəticədə 1.300 tondan artıq şərti yanacağa qənaət olunmuşdur.
İstehlakçıların fasiləsiz və keyfiyyətli elektrik enerjisi ilə təmin edilməsi istiqamətində görülmüş tədbirlər nəticəsində elektrik enerjisinin kəmiyyət və keyfiyyət göstəriciləri əsaslı surətdə yaxşılaşmışdır. Soyuq hava şəraitində istehlakçıların elektrik enerjisi ilə təchizatında heç bir ciddi problem yaranmamışdır.
Yanvarda Bakı Elektrik Stansiyasında 50 milyon kilovat-saatdan çox elektrik enerjisi istehsal edilmişdir. Bu, nəzərdə tutulduğundan 10 faiz artıqdır. Həmin müddətdə 80 tondan çox şərti yanacağa qənaət olunmuşdur.
Stansiyada energetika sisteminin sabitliyinin təmin edilməsi və istehsal olunan enerjinin istehlakçılara keyfiyyətlə çatdırılması məqsədi ilə tədbirlər həyata keçirilir. İstehsal edilən enerjini ötürən 110 kilovoltluq yardımçı stansiyada 40 meqavatlıq transformator və eleqaz açarlarında cari təmir işləri aparılacaqdır.
Bölmənin digər xəbərləri
