OTÜSTÜ XOKKEY ÜZRƏ OLİMPİYA SEÇMƏ TURNİRİ ÇƏRÇİVƏSİNDƏ NÖVBƏTİ OYUNLAR KEÇİRİLMİŞDİR
AZƏRTAC xəbər verir ki, aprelin 16-da Bakıda Otüstü Xokkey Kompleksində qadınlar arasında Olimpiya seçmə turniri çərçivəsində növbəti oyunlar keçirilmişdir. Yarışlarda Azərbaycan, Belarus, Çili, İspaniya, Keniya və Ukrayna yığma komandaları mübarizə aparırlar.
Günün son gərgin qarşılaşması İspaniya və Azərbaycan komandaları arasında keçirilmişdir. Xokkeyçilərimiz turnirin ən güclü komandasına 4:0 hesabı ilə uduzmuşlar.
Xatırladaq ki, Azərbaycan yığması aprelin 18-də Ukraynа komandası ilə görüş keçirəcəkdir.
Günün digər qarşılaşmalarında Ukrayna millisi Çili yığmasını 2:1, belaruslular isə Keniya xokkeyçilərini 4:0 hesabı ilə məğlub etmişlər.
Qeyd edək ki, sabah komandalar istirahət etdiyindən növbəti oyunlar aprelin 18-də baş tutacaqdır.
Turnirə aprelin 20-də yekun vurulacaqdır.
######
Bölmənin digər xəbərləri
