İQTİSADİYYAT
ÖZƏLLƏŞDİRMƏ NECƏ GEDİR
Respublikada aparılan iqtisadi islahatların əsas istiqamətlərindən biri dövlət əmlakının özəlləşdirilməsidir. Dövlət Statistika Komitəsindən AZƏRTAC-a daxil olmuş məlumatda bildirilir ki, özəlləşdirmə prosesi başlayandan 2002-ci il yanvarın 1-dək ölkədə ümumi dəyəri 488,7 milyard manat olan 33,7 min kiçik müəssisə və obyekt /1993-1995-ci illərdə özəlləşdirilmiş nəqliyyat vasitələri də daxil olmaqla/, o cümlədən 653 sənaye, 120 kənd təsərrüfatı müəssisəsi, 313 tikinti təşkilatı özəlləşdirilmişdir. Təkcə son bir ildə ümumi dəyəri 28,9 milyard manat olan 2474 kicik müəssisə və obyekt özəlləşdirilmişdir.
Özəlləşdirilmiş müəssisələrin əksəriyyəti hərracda satılmış, bir müəssisənin /obyektin/ orta satış qiyməti 21,8 milyon manat olmuşdur.
Orta və iri müəssisələrin özəlləşdirilməyə başladığı 1997-ci ildən bu il yanvarın 1-dək nizamnamə kapitalı 5227,5 milyard manat təşkil edən 1389 dövlət müəssisəsi səhmdar cəmiyyətinə çevrilmişdir.
Özəlləşdirmə prosesi başlayandan bəri dövlət büdcəsinə 553,5 milyard manat vəsait daxil olmuşdur. Dövlət müəssisələrinin yerləşdiyi torpaq sahələrinin özəlləşdirilməsindən əldə edilən vəsait isə 17,2 milyard manat təşkil etmişdir.
Komitənin məlumatında bildirilir ki, 2002-ci il yanvarın 1-dək 314,8 min mənzil özəlləşdirilmişdir ki, bu da özəlləşdirilməsi nəzərdə tutulan bütün mənzillərin 50,4 faizinə bərabərdir.