Pakistanın Preston Universitetində “Azərbaycanda Xocalı soyqırımı” mövzusunda konfrans keçirilmişdir
Bakı, 26 fevral (AZƏRTAC). Xocalı soyqırımının 21-ci ildönümü ilə əlaqədar Pakistanda reallaşdırılan silsilə tədbirlər çərçivəsində fevralın 26-da Preston Universitetində “Azərbaycanda Xocalı soyqırımı” mövzusunda konfrans keçirilmişdir.
Azərbaycanın Pakistandakı səfirliyindən AZƏRTAC-a bildirmişlər ki, tədbirdə bu ölkənin xarici işlər üzrə dövlət naziri Əhməd Malik Navabzadə, Senatın xarici əlaqələr komitəsinin sədri Hacı Adil, tanınmış ictimai-siyasi xadimlər, senatorlar, Preston, Milli Müdafiə, Qayde Azam, Müasir Dillər, Zülfüqar Əli Bhutto universitetlərinin rektorları, Türkiyə, Bolqarıstan, Ukrayna, Özbəkistan, İraq, Qazaxıstan, Tacikistanın və digər ölkələrin səfirləri, Türkiyə və Pakistan KİV-lərinin nümayəndələri iştirak etmişlər.
Xocalı soyqırımı qurbanlarının ruhuna dualar oxunduqdan sonra faciənin dəhşətlərini əks etdirən sənədli film nümayiş etdirilmişdir.
Preston Universitetinin rektoru, professor Əbdül Basit konfrans iştirakçılarına Ermənistan-Azərbaycan, Dağlıq Qarabağ münaqişəsi, Qarabağa ermənilərin köçürülməsinin tarixi haqqında məlumat vermişdir. O, Ermənistanın Azərbaycana təcavüzü nəticəsində Dağlıq Qarabağın və ətraf 7 rayonun zəbt olunduğunu vurğulamış, işğal nəticəsində bir milyon azərbaycanlının ata-baba yurdlarından didərgin salındığını, 20 min insanın öldürüldüyünü bildirmişdir. Professor A.Basit 1992-ci il fevralın 26-da Ermənistan silahlı qüvvələri tərəfindən Xocalı şəhərində mülki əhaliyə qarşı törədilmiş soyqırımını bu münaqişənin ən qanlı və faciəli səhifəsi adlandırmışdır.
Preston Universitetinin beynəlxalq əlaqələr fakültəsinin dekanı professor Sohail Məhəmməd insanlığa sığmayan bu hadisələrin ermənilər tərəfindən məqsədyönlü şəkildə edildiyini bildirmişdir. O, Xocalı soyqırımın fəal iştirakçılarından olan Ermənistanın hazırkı prezidenti Serj Sarkisyanın “Biz ermənilərin mülki əhalini məhv etməyə qadir olmadığı haqqında stereotipi qıra bildik” sözlərini buna sübut kimi qiymətləndirmişdir.
Asiya Sivilizasiyaları Assosiasiyasının prezidenti, Müasir Dillər Universitetinin dekanı professor Z.A.Qureyşi çıxışında Xocalıda dinc əhaliyə qarşı erməni silahlı birləşmələrinin törətdikləri vəhşiliklərin alman faşistlərinin cinayətlərini kölgədə qoyduğunu vurğulamışdır. Natiq Xocalı dəhşətlərinin xarici mətbuatda geniş işıqlandırıldığını bildirərək bəzi nəşrlərdən sitatlar gətirmişdir. Professor mülki şəxslərin xüsusi amansızlıqla öldürülməsinin, meyitlərin təhqir olunmasının beynəlxalq hüququn normalarına zidd olduğunu, soyqırımı törədənlərin cinayət məsuliyyətinə cəlb edilməsinin vacibliyini söyləmişdir. O, Xocalı qurbanlarının ailələrinə Ermənistan dövləti tərəfindən təzminat ödənilməsinin vacibliyini bildirmişdir.
Azərbaycanın Pakistandakı səfiri Daşqın Şikarov Ermənistanın ölkəmizə təcavüzü, Dağlıq Qarabağ problemi və Xocalı soyqırımı haqqında geniş məlumat vermiş, bu qətliamı törədənlərin məsuliyyətə cəlb olunmalarının vacibliyini bildirmişdir. Səfir Dağlıq Qarabağ məsələsində Azərbaycanın mövqeyini dəstəklədiyinə, həmçinin ötən il fevralın 1-də Senat tərəfindən Ermənistanın Azərbaycana təcavüzünü və Xocalı soyqırımını ittiham edən qətnamənin qəbul edilməsində göstərdiyi prinsipiallığa görə Pakistan Senatı və xalqına bir daha dərin minnətdarlığını bildirmişdir.
Tədbirə ali qonaq qismində qatılan Pakistanın dövlət naziri Əhməd Malik Navabzadə Xocalı soyqırımından danışmış, ermənilərin törətdikləri cinayət aktının beynəlxalq hüququn prinsiplərinə tam zidd olduğunu vurğulamışdır. Nazir Pakistan-Azərbaycan münasibətlərinin yüksək səviyyədə olduğunu qeyd edərək torpaqlarımızı işğal etdiyinə görə ölkəsinin Ermənistanı tanımadığını bildirmişdir. O, Pakistanın Dağlıq Qarabağ məsələsinin həllində Azərbaycanı tam dəstəklədiyini vurğulamış, bu dəstəyin işğal edilmiş torpaqların tam azad olunana qədər davam edəcəyini söyləmişdir. Pakistan Senatının Xocalı soyqırımını tanıdığını diqqətə çatdıran nazir digər ölkələri də bu addımı atmağa çağırmışdır.
Konfransın rəsmi hissəsindən sonra Pakistanın xarici işlər üzrə dövlət naziri və Senatın xarici əlaqələr komitəsinin sədri Türkiyənin “TRT Türk”, həmçinin Pakistanın yerli kanallarına müsahibə vermişlər. Müsahibələrdə Xocalı soyqırımından danışılmış, cinayətin təkcə Azərbaycan xalqına deyil, bütün bəşəriyyətə qarşı törədildiyi vurğulanmışdır. Bildirilmişdir ki, belə cinayət hadisələrinin gələcəkdə də təkrar olunmaması üçün Xocalı soyqırımına bütün dövlətlər və beynəlxalq təşkilatlar tərəfindən lazımi hüquqi qiymət verilməlidir.
Konfransdan sonra Pakistanın Bari İmam məscidində Xocalı soyqırımı şəhidlərinin ruhuna ehsan verilmiş, dualar oxunmuşdur.
Bölmənin digər xəbərləri
