Palata: Azərbaycanın coğrafi mövqeyi onu qlobal nəqliyyat dəhlizlərinin əsas mərkəzinə çevirir
Bakı, 22 oktyabr, AZƏRTAC
Bu il dəmir yolu nəqliyyatının Azərbaycanın ÜDM-dəki payı 5,4 faizdən 7 faizə yüksəlib.
AZƏRTAC xəbər verir ki, bunu Alman-Azərbaycan Xarici Ticarət Palatasının (AHK Azerbaijan) İdarə Heyətinin sədri Anar Həsənov “Azərbaycanda Dəmiryol Texnologiyalarında İnnovasiyalar: Alman şirkətləri üçün tərəfdaşlıqlar və imkanlar” forumunda çıxışı zamanı bildirib.
Onun sözlərinə görə, Azərbaycanda 2030-cu ilə qədər yükdaşıma həcmlərini illik 30 milyon tona çatdırmaq üçün iddialı məqsəd qoyulub.
“Dəmir yolları ən ekoloji təmiz nəqliyyat növlərindən biri olaraq qalır və bu, COP29 ərəfəsində dayanıqlı inkişaf məsələlərinin prioritetə çevrildiyi bir dövrdə xüsusi əhəmiyyət kəsb edir. Azərbaycanın coğrafi mövqeyi onu Şimal-Cənub və Şərq-Qərb qlobal nəqliyyat dəhlizlərinin əsas mərkəzinə çevirir”, - deyə A.Həsənov qeyd edib.
İdarə Heyətinin sədri bildirib ki, Azərbaycan təkcə ötən il təxminən 18-19 milyon ton yük daşıyaraq yükdaşımalarda rekord göstəricilərə nail olub.
Bölmənin digər xəbərləri
