Martın 10-da Milli Məclisin sədri Murtuz Ələsgərovun başçılığı ilə parlament nümayəndə heyəti LİNKS təşkilatının icraçı direktoru Dennis Sammut və İdarə heyətinin üzvü Stefan Nəşlə görüşmüşdür. Azərbaycanın ali qanunvericilik orqanının başçısını səmimi salamlayan Dennis Sammut bu görüşdən məmnun qaldığını vurğuladı. O dedi ki, Böyük Britaniya ilə Azərbaycan arasında iqtisadi, mədəni əlaqələrlə yanaşı, parlament əlaqələri də mövcuddur. Son illərdə bu münasibətlər inkişaf edib, Azərbaycan nümayəndə heyətinin səfəri həmin prosesin daha da genişlənməsinə xidmət edəcəkdir. Çox şadıq ki, bizim təşkilat da ölkələrimizin parlamentləri arasında əlaqələrin inkişafına kömək edir. LİNKS təşkilatının Cənubi Qafqaz parlament təşəbbüsü qurumu da bu istiqamətdə fəaliyyət göstərir. Bu məsələdə bizə Böyük Britaniya parlamenti və hökuməti böyük dəstək verir. Biz Dağlıq Qarabağ probleminin də təşkilatımız çərçivəsində müzakirə olunmasını istəyirik.

Səmimi sözlər üçün təşəkkürünü bildirən Milli Məclisin sədri Murtuz Ələsgərov son zamanlar LİNKS təşkilatının Avropada sülh və təhlükəsizliyin təmin edilməsində çox önəmli iş gördüyünü bildirdi. O dedi ki, Cənubi Qafqazda sülhün və əmin-amanlığın bərqərar olunması istiqamətində qurumun fəaliyyəti xüsusilə yüksək qiymətə layiqdir. LİNKS qeyri-hökumət təşkilatı yarandığı gündən Cənubi Qafqazdakı problemlərin həllinə çox ciddi maraq göstərir. 2001-ci ildə təşkilat çərçivəsində Londonda keçirilmiş Avropa və Qafqaz mövzusunda konfransda Azərbaycan nümayəndələri də iştirak etmişlər. 2002-ci ildə isə Cənubi Qafqaz regionunda xüsusi təhlükəsizlik qurumunun yaradılması məsələsi müzakirə olunmuşdu. Bu il Tbilisidə keçirilmiş seminar da Qafqazda təhlükəsizliyin bərqərar olması baxımından çox önəmli idi.

Parlamentin sədri respublikamızda aparılan geniş islahatlar barədə məlumat verərək bildirdi ki, Azərbaycan Prezidenti Heydər Əliyevin rəhbərliyi ilə ölkədə insan hüquqlarının qorunması, demokratiyanın inkişafı istiqamətində mühüm işlər görülmüşdür. Azərbaycan demokratik islahatların aparılması baxımından Qafqazda birinci yerdədir.

X X X

Sonra Milli Məclisin sədri Murtuz Ələsgərovun Böyük Britaniya parlamenti Xarici əlaqələr komitəsinin sədri Donald Andersonla görüşü keçirildi.

Azərbaycan parlamentinin başçısı ölkəmizin nümayəndə heyətini səfərə dəvət etdiklərinə görə Lordlar və İcmalar palatalarının rəhbərliklərinə minnətdarlığını bildirdi. O, səfərin məqsədi barədə danışaraq, bunun Böyük Britaniya ilə Azərbaycan arasında ikitərəfli əməkdaşlığın, xüsusilə parlament əlaqələrinin inkişafında mühüm rolu olacağını vurğuladı. M.Ələsgərov dedi ki, Britaniya kimi çoxəsrlik parlament təcrübəsinə malik olan bir ölkə ilə Azərbaycan Milli Məclisinin əməkdaşlıq etməsi bizim üçün çox önəmlidir. Azərbaycan xalqı öz müdrik Prezidenti Heydər Əliyevin rəhbərliyi ilə qısa dövr ərzində iqtisadi, sosial, siyasi sahələrdə böyük uğurlar qazanmışdır.

Bu gün Azərbaycan özünün zəngin karbohidrogen ehtiyatlarının istifadə olunması üçün dünyanın bir sıra iri şirkətləri, o cümlədən Böyük Britaniyanın bp şirkəti ilə yaxından əməkdaşlıq edir. Britaniya şirkətləri Azərbaycanda digər sahələrdə də fəaliyyət göstərirlər. 1994-cü ildən başlayaraq Prezident Heydər Əliyev bir neçə dəfə Böyük Britaniyaya səfər etmiş, burada səmərəli görüşlər keçirmiş və ölkələrimiz arasında ikitərəfli əlaqələrin möhkəm təməlini qoymuşdur. Ötən dövrdə Britaniya parlamentinin hər iki palatasının üzvləri də Azərbaycanda səfərdə olmuşlar. Milli Məclisin sədri dedi ki, respublikamız Böyük Britaniya ilə əlaqələrin inkişafına böyük əhəmiyyət verir və əməkdaşlığın daha yüksək səviyyəyə çatmasına çalışlır.

X X X

Həmin gün Milli Məclisin sədri Murtuz Ələsgərov Lordlar palatasının üzvü, Dünya Yəhudi Konqresinin vitse-prezidenti Canerlə də görüşdü. Lord Caner ötən il Azərbaycana səfərini xatırlayaraq respublikamızda keçirdiyi görüşlərin çox maraqlı olduğunu, ölkəmizdə yəhudilərin tam azad və bərabər hüquqlu vətəndaşlar kimi yaşadıqlarını bildirdi.

Milli Məclisin sədri Azərbaycanda ictimai-siyasi vəziyyət və Dağlıq Qarabağ problemi barədə lord Canerə ətraflı məlumat verdi.

X X X

Həmin gün nümayəndə heyəti Londonun Teyt incəsənət qalereyasi ilə tanış oldu. Sonra ATƏT-in Parlament Assambleyasının sədri, Böyük Britaniya parlamentinin Müdafiə məsələləri komitəsinin və Britaniya-Azərbaycan dostluq qrupunun başçısı Bryus Corcla görüş keçirildi. Cənab Bryus ölkəsinin Azərbaycanla münasibətlərinin inkişafında maraqlı olduğunu vurğuladı.

Milli Məclisin sədri ölkələrimizin qarşılıqlı əməkdaşlığından danışaraq, bu sahədə hər iki parlamentdə fəaliyyət göstərən dostluq qruplarının fəaliyyətini yüksək qiymətləndirdi.

M.Ələsgərov 1993-cü ildən etibarən Azərbaycanla Böyük Britaniya arasında bütün sahələrdə, o cümlədən parlamentlər səviyyəsində sivil münasibətlərin qurulduğunu xüsusi vurğuladı. Milli Məclisin sədri dedi ki, ölkələrimiz bir sıra beynəlxalq təşkilatlarda yaxından əməkdaşlıq edir. Azərbaycan NATO-nun assosiativ üzvüdür. Ölkəmiz regionda Türkiyə, Rusiya, İran, Gürcüstanla yaxşı əlaqələr qurmuşdur. Lakin bizim Dağlıq Qarabağ kimi problemimiz də var. Bu problemin həlli ilə ATƏT məşğul olur. Bu təşkilatın Parlament Assambleyasının həmsədri kimi siz həmin problemlə yaxından tanışsınız. Bilirsiniz ki, Ermənistan BMT-nin 4 qətnaməsinə məhəl qoymayaraq, Azərbaycan ərazisinin 20 faizini işğal altında saxlamaqda davam edir. Ermənistan terrorizmi dəstəkləyərək, hazırda Dağlıq Qarabağ ərazisindən narkotik bitkilərin əkilib-becərilməsi və tranziti məqsədi ilə istifadə edir. Parlamentin sədri vurğuladı ki, biz Prezident Heydər Əliyevin apardığı müdrik xarici siyasətə inanırıq və əminik ki, Azərbaycan tezliklə öz ərazi bütövlüyünü bərpa edəcəkdir.

X X X

Milli Məclisin sədri Murtuz Ələsgərovun başçılıq etdiyi nümayəndə heyəti həmin gün axşam Parlamentlərarası İttifaqın Britaniya qrupunun sədri Con Ostinlə də görüşdü. Con Ostin Böyük Britaniya və Azərbaycan arasında diplomatik əlaqələrin tarixindən danışaraq dedi ki, bu il həmin əlaqələrin qurulmasının 10 illiyi qeyd ediləcəkdir.

Milli Məclisin sədri Böyük Britaniyanın Azərbaycanın müstəqilliyini tanıyan ilk dövlətlərdən olduğunu vurğuladı. O dedi ki, Azərbaycan cəmi iki il bundan əvvəl Avropa Şurasına üzv qəbul edilsə də, artıq Milli Məclisin AŞPA-dakı daimi nümayəndə heyətinin başçısı İlham Əliyev bu qurumun sədrinin müavini və Büro üzvü seçilmişdir. Bu, Azərbaycanın Avropada gündən-günə artan nüfuzunun bariz nümunəsidir.

Azərbaycan nümayəndə heyəti bütün görüşlərdə Ermənistanın respublikamıza təcavüzünü, onun ağır nəticələrini əks etdirən kitablar və sənədlər, habelə deputat Vaqif Abdullayevin AŞPA sədrinin müavini və Büro üzvü İlham Əliyevə həsr etdiyi kitabın ingiliscə nüsxələri təqdim etmişdir.

Milli Məclisin nümayəndə heyətinin Böyük Britaniyaya səfəri davam edir.

Ceyhun Quliyev

Milli Məclisin mətbuat

xidmətinin əməkdaşı