SİYASƏT
“Payomi Dushanbe” qəzetində Azərbaycan Silahlı Qüvvələri Günü ilə bağlı məqalə dərc olunmuşdur
Düşənbə, 28 iyun (AZƏRTAC). Azərbaycanın Tacikistandakı səfirliyinin təşəbbüsü ilə “Payomi Dushanbe” qəzetində 26 İyun-Silahlı Qüvvələr Günü ilə bağlı rus dilində geniş məqalə dərc edilmişdir.
Məqalədə Azərbaycan Ordusunun yaranma tarixindən, keçdiyi çətin və şanlı yoldan, göstərdiyi rəşadətdən bəhs edilir.
Yazıda 1991-ci ildə Azərbaycanın milli ordusunun yaranması, ümummilli lider Heydər Əliyevin 1993-cü ildə xalqın təkidli tələbi ilə hakimiyyətə qayıtması, Ulu Öndərin ordu quruculuğuna diqqəti haqqında da məlumat verilir.
Qeyd olunur ki, Azərbaycan Prezidenti İlham Əliyev ulu öndər Heydər Əliyevin siyasi kursunun layiqli davamçısı kimi milli ordumuzun hərtərəfli inkişafına böyük diqqət yetirir. Yazıda Azərbaycan Müdafiə Sənayesi Nazirliyinin fəaliyyəti barədə də məlumat verilir, ölkəmizin hərbi sənaye kompleksinin nailiyyətləri haqqında söhbət açılır. Azərbaycanın hərbi büdcəsinin Ermənistanın dövlət büdcəsindən 2 dəfə çox olduğu vurğulanır. Müəllif Azərbaycan Ordusunun Cənubi Qafqazın ən güclü ordusu olduğunu vurğulayır.
Məqalədə Azərbaycanın NATO, həmçinin ayrı-ayrı dövlətlərlə hərbi sahədə əməkdaşlığı, dünyada sülh və sabitliyin təmin olunması üçün verdiyi töhfələrdən də bəhs edilmişdir.
Qulu Kəngərli
AZƏRTAC-ın xüsusi müxbiri
Düşənbə