Paytaxt sakinlərinə rayon qeydiyyatlı vətəndaşların şəxsiyyət vəsiqələrini verərək postdan keçirmək istəyən şəxslər saxlanılıblar
Bakı, 22 avqust, AZƏRTAC
Baş Dövlət Yol Polisi İdarəsinin əməkdaşları avqustun 21-də Qaradağ rayonunun Ələt qəsəbəsinin ərazisində karantin rejimi ilə əlaqədar qurulmuş postda Astara rayon sakini R.İsgəndərovun idarə etdiyi “Mercedes” markalı mikroavtobusu saxlayıblar.
Daxili İşlər Nazirliyinin mətbuat xidmətindən AZƏRTAC-a bildiriblər ki, yoxlama zamanı R.İsgəndərovun və sərnişini Şabran rayon sakini A.İsayevin Bakı şəhər sakinləri olan 7 sərnişinə pul müqabilində rayon qeydiyyatlı vətəndaşlara məxsus şəxsiyyət vəsiqəsi verərək onları rayon istiqamətinə postdan keçirməyə cəhd etməsi müəyyənləşdirilib.
Həmin yeddi nəfər barəsində İnzibati Xətalar Məcəlləsinin 211.1-ci maddəsi ilə protokol tərtib edilib. R.İsgəndərov və A.İsayev isə müvafiq araşdırmaların aparılması üçün Qaradağ Rayon Polis İdarəsinin 11-ci polis bölməsinə təhvil veriliblər.
Bölmənin digər xəbərləri
