Paytaxtda beş kiloqramdan çox narkotik vasitə qanunsuz dövriyyədən çıxarılıb
Bakı, 20 iyul, AZƏRTAC
Daxili işlər orqanlarının əməkdaşları narkotik vasitələrin qanunsuz dövriyyəsinə qarşı mübarizə tədbirlərini qətiyyətlə davam etdirirlər.
Daxili İşlər Nazirliyinin mətbuat xidmətindən AZƏRTAC-a bildiriblər ki, narkotiklərin qanunsuz dövriyyəsində şübhəli bilinən Biləcəri qəsəbə sakini, əvvəllər məhkum olunmuş A.Qasımov Baş Narkotiklərlə Mübarizə İdarəsi əməkdaşlarının daxil olmuş məlumat əsasında Binəqədi rayonu ərazisində keçirdikləri əməliyyat tədbiri nəticəsində saxlanılıb. Şəxsi axtarış zamanı ondan 1 kiloqram 70 qram heroin götürülüb.
Baş Narkotiklərlə Mübarizə İdarəsi əməkdaşlarının daxil olmuş məlumat əsasında Xəzər rayonu ərazisində keçirdikləri əməliyyat tədbiri nəticəsində isə narkotiklərin qanunsuz dövriyyəsində şübhəli bilinən Buzovna qəsəbə sakini, əvvəllər məhkum olunmuş Ə.Ələkbərov saxlanılıb. Şəxsi axtarış zamanı ondan 4 kiloqram 25 qram marixuana götürülüb.
Hər iki faktla bağlı araşdırma aparılır.
Bölmənin digər xəbərləri
