Paytaxtımızda keçirilən dünya çempionatının sonuncu qızıl medalını Böyük Britaniya gimnastları qazanıblar
Bakı, 13 mart, AZƏRTAC
Bakıda keçirilən akrobatika gimnastikası üzrə 28-ci dünya çempionatının sonuncu qızıl medalını Böyük Britaniya komandası qazanıb.
AZƏRTAC xəbər verir ki, kişi qrupların temp hərəkətində final yarışında britaniyalı gimnastlar 28,690 xalla bütün rəqiblərini qabaqlayaraq fəxri kürsünün ən yüksək pilləsinə qalxıblar. İsrail qrupu 27,900 xalla çempionatı ikinci, Belçika idmançıları (27,890) üçüncü pillədə başa vurublar.
Azərbaycan komandası dünya çempionatını 3 medalla başa vurub. Belə ki, Daniel Abbasov və Murad Rəfiyevdən ibarət kişi cütlüyümüz qarışıq və temp hərəkətlərində bürünc, Ağasif Rəhimov və Raziyə Seyidlidən ibarət qarışıq cütlüyümüz isə temp hərəkətində gümüş medal qazanıblar.
Xatırladaq ki, 2018-ci ildə Azərbaycan ilk dəfə akrobatika gimnastikası üzrə dünya kuboku turnirinə, bu il martın 3-dən 6-dək isə 12-ci dünya yaş qrupları yarışlarına ev sahibliyi edib.
Bölmənin digər xəbərləri
