- Möhtərəm cənab Prezident!

Sizi Azərbaycanımızın ən gözəl guşələrindən birində, cənub incisi

adlanan Astarada rayon ictimaiyyəti və ziyalıları adından salamlayır, Sizə “Xoş gəlmisiniz!” deyirəm.

Möhtərəm Prezident! Biz hələ də Sizin bir il bundan əvvəl Astaraya gəlişinizin xoş təəssüratı altındayıq. Ötən bir il ərzində rayonumuzda yüksək inkişaf olmuş, yeni iş yerləri açılmışdır. Sizin hər gəlişiniz bizim üçün sevincdir, bayramdır. Qədəmləriniz mübarək olsun! İnanırıq ki, bu gəlişiniz də uğurlu olacaq və bütün sahələrdə inkişaf olacaqdır.

Möhtərəm Prezident, ulu öndər, ümummilli liderimiz Heydər Əliyevin Azərbaycanımız üçün etdikləri barədə illərlə, aylarla danışmaq olar. Biz ulu öndərimizin siyasətini həmişə dəstəkləmişik və dəstəkləyəcəyik.

Astaralılar ulu öndərimizin onlar haqqında dediyi xoş sözləri həmişə yadda saxlayırlar və heç zaman unutmurlar. Fərəhli haldır ki, bu gün Sizin kimi qüdrətli və layiqli oğlu ulu öndərimizin siyasətini uğurla davam etdirir.

İndi təkcə Astarada deyil, bütün Azərbaycanda yüksəliş dövrüdür. Haraya baxırsan, inşaat-abadlıq işləri gedir. Yeni iş yerləri yaradılır, əmək haqları artırılır, tələbələrin təqaüdləri artırılır. Bütün bunlara görə Sizə minnətdarıq, çox sağ olun.

Cənab Prezident! Bu gün respublikada ilk dəfə olaraq rayonumuzda modul tipli elektrik stansiyasının bünövrəsinin qoyulması və qaz-kompressor stansiyasının açılması bizim regiona, bizim bölgəyə olan böyük etimadınızın nəticəsidir. Çox sağ olun. Biz buna həm sevinirik, həm də Sizə olan inamımız qat-qat artır.

Cənab Prezident! Siz neçə illərdir ki, həm də respublika Olimpiya Komitəsinin rəhbəri kimi fəaliyyət göstərirsiniz. İdmançılarımızın dünya meydanlarında öz dəst-xətləri vardır və bu müvəffəqiyyətin qazanılmasında astaralı idmançıların da çox böyük rolu vardır. Öz adımdan, rayonumuzun gəncləri adından, bütün idmançılar adından xahiş edirəm ki, Astarada da müasir tipli Olimpiya İdman Kompleksinin tikilməsi üçün sərəncam verəsiniz.

Cənab Prezident, Azərbaycan xalqı seçkilərə hazırlaşır. Sizi əmin etmək istəyirəm ki, bizim rayonumuzda da xalq öz layiqli övladlarına səs verəcəkdir. Düzdür, müxalifət müxtəlif üsullardan istifadə edərək, bəzən suyu bulandırmaq istəyir. Lakin xalq onlara inanmır, kimin kim olduğunu yaxşı tanıyır.

Fürsətdən istifadə edərək, sadə əməyimi qiymətləndirib mənə Azərbaycanımızın əməkdar müəllimi adını verdiyinizə görə dərin minnətdarlığımı bildirirəm. Bir daha Sizə “Xoş gəlmisiniz!” deyirəm. Sizə cansağlığı, ailə səadəti, Azərbaycanımızın bayrağının daha da yüksəklərə qaldırılması naminə şərəfli işinizdə müvəffəqiyyət arzu edirəm.

Sağ olun!

X X X

Dövlətimizin başçısı mərasimdə nitq söylədi.

Bir sözlə, bütün bu görülən işlər imkan verəcək ki, ölkəmiz hərtərəfli inkişaf etsin, bölgələrdə abadlıq-quruculuq işləri daha da sürətlə getsin.

Bu bölgədə son illər ərzində böyük işlər görülüb və daha da böyük işlər görüləcəkdir: Astara elektrik stansiyasının tikintisi, qaz-kompressor stansiyasının tikintisi, Astara-Qazıməmməd magistral qaz kəmərinin bərpası. Sonuncu bu bölgəyə böyük təzyiqlə qaz verilməsini təmin edəcəkdir. Bu gün Lənkəranda tikiləcək aeroportun təməl daşını qoyduq. Bu aeroport bütün bölgəyə xidmət edəcəkdir. Eyni zamanda, Lənkəranda regional müalicə və diaqnostika mərkəzinin təməlini qoyduq. Orada ən müasir tibb avadanlığı olacaqdır. Həmin mərkəz bütün bölgəyə xidmət edəcəkdir.

İqtisadi islahatlar və sosial problemlərin həlli paralel məsələlərdir. Biz bunları bir-birindən ayıra bilmərik. Bazar iqtisadiyyatı siyasətinə sadiqik və Azərbaycan bu yolla inkişaf edir. Ancaq eyni zamanda, sosial məsələlərin həllinə böyük diqqət göstərilməlidir. Çünki biz xalq üçün işləyirik, xalq üçün fəaliyyət göstəririk. Xalq bizə, iqtidara etimad göstərib və biz də çalışmalıyıq ki, bu etimadı doğruldaq.

Bizim büdcəmiz həm investisiya yönümlüdür, həm də sosial yönümlüdür. Büdcəmiz artır. Mən dəfələrlə bəyan etmişdim ki, büdcəmiz ildən-ilə çox yüksək templə artmalıdır. Gələn il büdcəmiz 1 milyard və bəlkə də 1,5 milyard dollar artacaqdır. Azərbaycanın illik büdcəsi 3,5 milyard dollar olmalıdır. Halbuki, 2004-cü ildə 1,5 milyard dollar idi. İki il ərzində xəzinəmizə iki milyard dolların daxil olması çoxlu problemlərimizin həllinə kömək edəcəkdir.

Bu stansiya da həmin pullara alınır. Stansiyanın tikintisi üçün biz heç bir kredit götürmürük, beynəlxalq maliyyə təsisatlarına müraciət etmirik. Öz vəsaitimiz var, öz pulumuz var. Bu pulu da gərək çox səmərəli işlədək, Azərbaycanı narahat edən, ölkəmizə ən böyük çətinlik yaradan problemlərin aradan qaldırılmasına yönəldək.

Bütün bu görülən işlərin təməlində 1990-cı ilin ortalarında başlanmış Heydər Əliyevin neft strategiyası dayanır. Bu barədə çox danışılır, çox sözlər deyilir. Artıq hamı üçün aydındır ki, bu siyasət Azərbaycanın indiki inkişafına çox gözəl təsir göstərir. Eyni zamanda, bu, ölkəmizin qarşısında duran bütün məsələlərin həllinə kömək edəcəkdir.

Çünki hər şey imkanla, iqtisadi vəziyyətlə, ölkəmizin maliyyə qurumu ilə bağlıdır. Əgər imkan olmasa, vəsait olmasa, heç bir işi görmək mümkün deyildir. Azərbaycan müstəqilliyini bərpa etdikdən sonra tək qalmışdı. Heç kim bizə kömək etmirdi, heç bir yardım almırdıq. Biz həmişə öz gücümüzə arxalanırdıq. Ancaq yadınızdadır ki, o illər necə ağır keçibdir. 1990-cı illərin əvvəlindəki iqtisadi böhran, xaos, hərc-mərclik, ictimai-siyasi sabitliyin pozulması ölkəmizi faktiki olaraq dünya xəritəsindən silirdi.

Ancaq Azərbaycanın bugünkü inkişafına baxın. Düzdür, problemlər var və biz onları bilirik və həll də edirik. Ancaq Azərbaycan dünyada ən sürətlə inkişaf edən ölkədir. Azərbaycana çoxlu investisiyalar qoyulur. Azərbaycanda yeni yollar, elektrik stansiyaları tikilir, su xətləri, qaz xətləri çəkilir. Azərbaycanın hərbi potensialı möhkəmlənir. Bura sərhəd rayonudur. Sərhədlərimiz də lazımi səviyyədə qorunur və sərhəd infrastrukturunun inkişafına vəsait ayrılır. Hərbi büdcəmiz gələn il iki dəfə artacaqdır. Bütün başqa xərclər də artacaq, maaşlar, təqaüdlər qaldırılacaqdır. İnkişaf budur. Hər bir ölkənin inkişafı üçün bu amillər çox böyük əhəmiyyət kəsb edir. Ona görə bu gün görülən işlər həm Azərbaycanın bu gününə, həm də sabahına xidmət edəcəkdir.

Bu stansiya, sadəcə, bir stansiya deyil, bölgənin inkişafına böyük təsir göstərəcək obyektdir. Mən əminəm ki, stansiya dekabrın sonuna qədər tikilib istifadəyə veriləcək və siz də bunun səmərəsini görəcəksiniz.

Əziz astaralılar, yadımdadır, bir il bundan əvvəl Astaraya gəlmişdim, sizinlə görüşmüşdüm. O vaxt müraciətlər oldu, şikayətlər oldu, mənə məktublar verildi. Bu müraciətlərə, məktublara operativ şəkildə reaksiya verildi. Çünki hər bir fərdin məsələsi bizim üçün vacibdir. Əgər insanı nə isə narahat edirsə, əgər o müraciət edirsə, deməli, problemi var və o problem də gərək öz həllini tapsın. Mən sizi əmin etmək istəyirəm ki, gələcək fəaliyyətimdə də bu siyasətə sadiq olacağam, əlimdən gələni edəcəyəm ki, Azərbaycan daha da möhkəmlənsin, Azərbaycanda hər bir insan daha da yaxşı yaşasın.

Sizi bir daha ürəkdən salamlayır və sizə cansağlığı, xoşbəxtlik arzulayıram. Sağ olun.

(Azərbaycan Prezidentinin nitqi diqqətlə dinlənildi və alqışlarla qarşılandı).