Peru Parlamentinin üzvü: 12 milyon sakini olan Lima şəhərinin əhalisinin 10 faizinin içməli suya çıxışı yoxdur
Bakı, 20 may, AZƏRTAC
Perunun ən böyük şəhəri Limada bu gün 12 milyon əhali yaşayır. 1940-cı ildə isə şəhərin cəmi 600 min sakini var idi.
AZƏRTAC xəbər verir ki, bunu Peru Parlamentinin üzvü Ümumdünya Şəhərsalma Forumunun 13-cü sessiyası (WUF13) çərçivəsində keçirilən “Milli qanunvericilik qlobal mənzil öhdəliklərini real nəticələrə necə çevirə bilər?” mövzusunda parlament üzvlərinin dəyirmi masasında deyib.
Onun sözlərinə görə, əlverişli mənzil təchizatının olmaması səbəbindən kənd yerlərindən gələn miqrantlar "işğal" adlanan və boş dövlət və ya xüsusi torpaqların mütəşəkkil kollektiv zəbti olan üsula əl atdılar.
"Dövlət buna ikili siyasətlə cavab verdi: rəsmi olaraq işğalları qadağan etdi, qeyri-rəsmi yaşayış məskənlərini şəhər kasıbları üçün mənzil həlli kimi faktiki olaraq qəbul etdi. Bu, yolların və su infrastrukturunun çox vaxt sakinlərin özlərindən onilliklər sonra gəlib çatdığı xaotik şəhər böyüməsinə səbəb oldu. Bu gün Lima şəhərinin 10 faizinin içməli suya çıxışı yoxdur.
Bu vəziyyət XXI əsrdə də davam edir. Perudakı hər on evdən yeddisi özü tikiləndir və bu, bir problemdir, çünki Peru Yer kürəsinin seysmik zonasında yerləşir", - deyə Peru Parlamentinin üzvü diqqətə çatdırıb.
Fotoqraf - Səfiyar Məcnun
Bölmənin digər xəbərləri
