PETRARKANIN MƏZARININ AÇILMASI İTALYANLARI MƏYUS ETMİŞDİR
Demə, italyan şairinin qafa tası çoxdan oğurlanmışdır. Kəllədəki dişlərdən və skeletin qabırğalarından götürülmüş DNT nümunələrinin tədqiqi göstərmişdir ki, kəllə və skelet ayrı-ayrı adamlara məxsusdur. Bundan əlavə, müasirlərinin yazdığına görə, Petrarka ucaboy adam olmuşdur. Məzarda tapılan kəllə isə çox balacadır və skeletə heç cür uyğun gəlmir.
Təəssüf ki, bu, alimlərin məşhur şairin xarici görkəmini bərpa etmək ümidlərini heçə endirir. Hər şeyi bilmək istəyən italyanlar Lauranın sevgilisinin bizim dövrədək gəlib çatmış portretlərinin həqiqətə uyğun olmasından şübhələnərək, 600 il əvvəl dünyasını dəyişmiş şairin məzarını açmaq qərarına gəlmişlər. Lakin Paduyadakı məqbərə tamam başqa sirri açmışdır. Petrarkanın qafa tasını kimin, nə zaman və nə məqsədlə oğurladığını aydınlaşdırmaq mümkün deyildir. Ancaq alimlər kəllənin İtaliyadakı evlərdən birində saxlandığına ümid bəsləyirlər. Odur ki, ölkə rəhbərliyi Petrarkanın simasının təsvirini yaratmaq naminə kəlləni qaytarmaq xahişi ilə xalqa müraciət etmişdir.
