PİVƏ PODAQRA XƏSTƏLİYİNƏ TUTULMAQ RİSKİNİ ARTIRIR
AZƏRTAC-ın xarici informasiya agentliklərindən aldığı xəbərə görə, ABŞ alimləri pivəsevərlər üçün xoşagəlməz, lakin sağlamlığı qorumalarına kömək edəcək tədqiqat aparmışlar. Sən demə, bu içkinin mütəmadi qəbul edilməsi podaqra xəstəliyinə tutulmaq riskini artırır. Massaçusets ştatının ən iri klinikasında doktor Xion Çoy və həmkarları 12 il ərzində 47 min kişinin nə qədər spirtli içki qəbul etdiklərini qeydə almaqla, onların səhhətini nəzarətdə saxlamış və belə qənaətə gəlmişlər ki, pivə həvəskarlarında oynaq xəstəliyinə tutulmaq riski həddən artıq çoxdur. Gündə iki parç pivə içmək bu riski 2,5 dəfə artırır. Məsələ bundadır ki, podaqranın səbəbi qanda sidik turşusunun çoxluğudur. Bu turşu oynaqlarda, xüsusilə, ayaqların baş barmaqlarında və topuqlarda kristal hissəciklər əmələ gətirir. Tərkibində purin adlanan maddə olan qida məhsulları və içkilər sidik turşusunun miqdarını artırır. Pivənin tərkibində isə bu maddənin miqdarı kifayət qədərdir.
Xatırladaq ki, son 30 ildə dünyada podaqraya tutulanların sayı xeyli artmışdır. Podaqra asan sağalan xəstəliklərdən sayılsa da, onun törətdiyi fəsadlar böyrəklərə pis təsir göstərir.
Bölmənin digər xəbərləri
