Politoloq: Beynəlxalq ictimaiyyətin Qarabağdakı “seçkiləri” tanımaması Azərbaycanın düzgün mövqedə olduğunu göstərir
Bakı, 16 sentyabr, AZƏRTAC
Azərbaycanın Qarabağ iqtisadi rayonunda separatçı rejimin keçirdiyi qondarma “prezident seçkiləri” dünyanın heç bir sivil ölkəsi tərəfindən tanınmadı. Ölkə Konstitusiyasına və beynəlxalq hüquqa zidd olaraq keçirilən “seçkilər” Azərbaycanın suverenliyinə, təhlükəsizliyinə ciddi təhdid kimi qəbul olunur. Əksər dövlətlər ölkəmizin ərazi bütövlüyünü dəstəkləyir və qondarma rejimin seçki keçirməsini pisləyir. Bütün bu yanaşmalar Azərbaycanın haqlı yolda və düzgün mövqedə olduğunu göstərir.
Bu sözləri AZƏRTAC-a açıqlamasında politoloq Ramiz Alıyev söyləyib.
Politoloqun sözlərinə görə, qardaş Türkiyədən əlavə, Pakistan, ABŞ, Macarıstan, Rumıniya, Ukrayna, Gürcüstan və digər ölkələr, həmçinin BMT, Avropa İttifaqı (Aİ), Avropa Şurası (AŞ), Türk Dövlətləri Təşkilatı (TDT), İslam Əməkdaşlıq Təşkilatı (İƏT) tərəfindən pislənilən və qəbul edilməyən bu “seçkilər”, əslində, ermənilər və onların havadarları üçün siqnal olmalıdır. “Beynəlxalq ictimaiyyət Qarabağdakı separatçı rejimi heç vaxt tanımayıb, bundan sonra da tanımayacaq. Ermənistanın baş naziri Nikol Paşinyan bütün bunları dərk etdi və Qarabağın Azərbaycan torpağı olduğunu bildirdi. O, Qarabağ məsələsinin erməni arqumentləri ilə həll olunmadığını Ermənistan parlamentində açıq şəkildə bildirdi. Əslində, qeyd etmək istədi ki, Ermənistandakı xəstə təfəkkürlü bir qrup insanın yanaşmaları və xəyalları ilə nə Azərbaycan, nə də dünya ölkələri razılaşır. Oradakı revanşistlər tez-tez beynəlxalq hüquqa uyğun olmayan, reallığa əsaslanmayan “təklif” və “layihələr” ilə çıxış edirlər. Onlar özləri danışıb, özləri eşidirlər və elə bilirlər ki, dünya bunların sərsəm təkliflərini qəbul edəcək. Xəstə Ermənistan cəmiyyəti düşünür ki, nə vaxtsa vəziyyət onların xeyrinə dəyişəcək və Qarabağı işğal edib orada dövlət yaradacaqlar. O dövr daha heç vaxt olmayacaq. Azərbaycan ermənilərə danışıqlar və reinteqrasiya təklif edib. Qondarma rejim isə dialoqa, müzakirələrə mane olur. Qarabağdakı sıravi ermənilər əsir kimi saxlanılır. Onlara imkan vermirlər ki, Azərbaycan cəmiyyətinə inteqrasiya olunsunlar. Azərbaycan bütün kommunikasiyaların açılmasını təklif etdi, Xankəndiyə alternativ yollar, istənilən yük daşımalarını təklif etdi. Separatçı rejimin tör-töküntüləri bununla da razılaşmadı. Rejim bir tərəfdən “blokada və soyqırımı”ndan danışır, digər tərəfdən isə Azərbaycandan göndərilən yardımları qəbul etmir. Artıq dünya ölkələri, beynəlxalq təşkilatlar Ermənistanda və Qarabağda islaholunmaz ermənilərin mövcudluğuna inanırlar. Başa düşürlər ki, onlar utopik arzularla yaşayırlar. Bu isə olduqca təhlükəli tendensiyadır”, - deyə o bildirib.
Hazırda Qarabağda təhlükəli hərəkətliliyin olduğunu vurğulayan R.Alıyev qeyd edib: “Sentyabrın 13-də Laçında ekskavator tank əleyhinə minaya düşdü. Ondan az sonra məlumat yayıldı ki, Rusiya sülhməramlılarının yerləşdiyi Azərbaycan ərazisində olan erməni silahlı dəstələri kəşfiyyat-diversiya işləri aparmaq istəyiblər. Onlar Ordumuzun Kəlbəcər rayonunun Mərcimək yaşayış məntəqəsi istiqamətində yerləşən döyüş mövqelərinin arasındakı dərə boşluqlarından içəriyə doğru sızmağa çalışıblar. Hərbçilərimizin sayıqlığı nəticəsində təxribatın qarşısı alınıb. Erməni diversantlar yaralı verərək ərazidən qaçmağa məcbur olublar. Bütün bunlar bir daha onu göstərir ki, qanunsuz hərbi birləşmələr, minalanma, səngər qazıntıları, mühəndis işləri aparan ermənilər ilə bağlı Ordumuz ciddi tədbirlər görməlidir. Qarabağda sülhməramlıların müvəqqəti nəzarətində olan hissəsində isə “boz zona” yaradılıb. Hər cür caninin sığındığı o ərazidə heç bir qanun işləmir, silahlı dəstələrə heç bir nəzarət yoxdur. Təəssüf ki, Rusiya sülhməramlı kontingenti 2020-ci il 10 noyabr tarixli üçtərəfli Bəyanatda qeyd olunan bəndin - silahlı ermənilərin ərazidən çıxarılmasının icrasını bu günə qədər həyata keçirməyib. Bu cür “boz zona”lar vaxtilə Şimali İrlandiyada da mövcud idi. Bu gün Kolumbiyada narkokartellərin nəzarət etdiyi məntəqələr də bu qəbildəndir. Hesab edirəm ki, problemin yeganə həlli Ordumuzun ərazidə təmizləmə işləri aparmasıdır”.
Politoloq sonda diqqətə çatdırıb ki, Azərbaycan regionda sülhün və təhlükəsizliyin təmin olunmasında maraqlıdır. Lakin Ermənistan və onun havadarları Cənubi Qafqazda vəziyyətin gərgin olaraq qalmasına çalışırlar. Biz imkan verməməliyik ki, hansısa qüvvələr öz çirkin oyunlarını Azərbaycan ərazilərinə köçürsün və burada təhlükəli vəziyyət yaratsın. Baş verənlər antiterror əməliyyatının keçirilməsini vacib edir.
Bölmənin digər xəbərləri
