Bakı, 20 avqust, AZƏRTAC

Varşava şəhərində keçirilən minifutbol üzrə Polşa Liqa qalibləri turnirinin çempionu olan Azərbaycanın “Land of Fire” komandasının baş məşqçisi Ülvi Musayev AZƏRTAC-ın suallarını cavablandırıb. Həmin müsahibəni təqdim edirik.

- İlk növbədə, özünüz haqqında ətraflı məlumat verərdiniz.

-1999-cu ildə Bakı şəhərində anadan olmuşam. Futbolla ilk tanışlığım U-12 liqasından başlayaraq U-17 liqasına qədər oynadığım “Vətən” uşaq komandasında olub. Ali təhsilimi Türkiyənin Düzcə Universitetində “futbol məşqçiliyi” bölümü üzrə bitirmişəm. Təhsil aldığım müddətdə iki klubla çalışmışam. İlk olaraq məşqçiliyə “Altınordu” klubunda başladım. Sonra Düzcə şəhərinin qadın futbol komandasına baş məşqçi təyin olundum. 2021-ci ildə isə magistratura təhsili almaq üçün Polşaya yollandım. Buraya gəldiyim gündən etibarən “Land of Fire” minifutbol klubunda baş məşqçi kimi çalışıram.

-Maraqlıdır, “Land of Fire” klubunun təməli necə qoyuldu və bu adın müəllifi kimdir?

-Klubun təməli Azərbaycan Diasporla iş üzrə Dövlət Komitəsinin Polşa Koordinasiya şurasının koordinatoru Əli Nəcəfov tərəfindən qoyulub. Klubun inkişafında və adının seçilməsində Əli Nəcəfov və Heydər Qurbanov böyük rol oynayıblar. “Land of Fire”nin mənası “Odlar Yurdu” deməkdir. Azərbaycanı təmsil etdiyimiz üçün belə bir ad seçilib. Polşada azərbaycanlıların sayı yetərincə çoxdur. Burada keçmişdə futbolla məşğul olan və hal-hazırda aktiv şəkildə futbol oynayan oyunçularımız var. Buna görə də klub yaradıb, Polşada Azərbaycan komandası olaraq ölkəmizi təmsil etmək fikri irəli sürüldü. Polşada 80 minə yaxın erməni əhali yaşayır. Ən sıx yaşadıqları məkan isə məhz bizim Sileziya regionudur. Onlar burada ermənilərdən təşkil olunmuş komanda da yaradıblar. Ümumiyyətlə Polşada demək olar ki, hər millətin öz komandası var. Fikirləşdik ki, niyə də azərbaycanlılardan təşkil olunan bir komanda olmasın? Burada kifayət qədər oyunçularımız və hemyerlilərimiz var. Bununla da Polşa Azərbaycanlıları Şurası Fərid Cəfərli və türkiyəli iş adamı Sercan Uçarın maddi və mənəvi dəstəkləri ilə 2021-ci ildə “Land of Fire” komandasının əsası qoyuldu.

-Avqustun əvvəllərində Varşava şəhərində keçirilmiş Polşa liqa qalibləri turnirinin çempionu olmusunuz. Bu barədə təəssüratlarınızı da bilmək istərdik.

-Mövsümü çox yaxşı keçirdik. Liqada 20 oyunda 17 qələbə, 2 heç-heçə və 1 məğlubiyyət aldıq. Bununla da biz Polşa üzrə liqa qalibləri turnirində iştirak hüququ qazandıq. Varşavada keçirilən bu turnirin 8 oyununda da məğlub olmadıq, 7 qələbə və 1 bərabərliklə çempion adına layiq görüldük. Bununla da Polşanı Yunanıstanda keçiriləcək minifutbol üzrə Çempionlar Liqasında təmsil etmək hüququ qazandıq. Bizim oradakı ən böyük motivasiyamız azərbaycanlı olmağımız idi. Qələbə qazanmağı özümüzə borc bilirdik. Ümumiyyətlə, komandada birlik çox önəmlidir. Yerli və əcnəbi olmağına baxmayaraq, “Land of Fire”nin hər bir üzvü Azərbaycan komandasında oynadığını dərk edir. Biz öz aramızda danışanda da bir-birimizə kubok üçün əlimizdən gələni etməli olduğumuzu bildirirdik. Doğrudan da yaxşı oyunlar keçirdik. Ötən il çempion olan klubla də qarşılaşdıq. Çox çətin rəqiblərlə üz-üzə gəlsək də kuboku əldə etməyi bacardıq. Fəxr edirik ki, Azərbaycan komandası ümumi Polşa üzrə bu kubokun qalibi oldu.

-Hazırda Azərbaycanda minifutbol yüksək səviyyədə inkişaf edir. Maraqlıdır, Polşadakı bu komandanızı Azərbaycan liqasında oynatmaq istəyərdinizmi?

-Bu aralar Azərbaycan minifutbolu inkişaf dövrünü yaşayır. Bu da bizi çox qürurlandırır və yetərincə motivasiya verir. Fikrimcə, komandamızı Azərbaycanda oynadıb-oynatmamaq barədə indidən nəsə demək tezdir. Çünki bizim hazırda əsas hədəfimiz klubumuzu Polşada yüksək liqalara daşımaq, “Land of Fire” komandasını və burada oynayan futbolçularımızı zirvələrə çıxarmaqdır. Məsələn, ötən il klubumuzun formasını geyinmiş iki azərbaycanlı oyunçu - Əlisahib Əmiraslanov və Emin Mustafayev Polşanın 4-cü liqasında oynayan komandadan təklif aldılar və müqavilə əsasında orada oynadılar. Bu cür halların daha çox olmasını istərdik.

-Komandanızda Azərbaycan futbol və ya minifutbol millisində çıxış etmiş oyunçular varmı?

-Bəli, var. Aslan Bədəlzadə “Qarabağ” və “Şamaxı”nın əsas komandasında və Azərbaycan U-17 və U-19 yığmalarında oynayıb. Hazırda Polşa “Jaguar Gdansk” klubunda çıxış edir və burada öz karyerasını davam etdirir. Emin Mustafayev “Vətən” uşaq komandasında oynayıb, uşaqlardan ibarət Azərbaycan millisinə də dəfələrlə dəvət alıb. Əlisahib Əmiraslanov “Vətən” uşaq komandasında və “Neftçi”də oynayıb. Murad Qocayev də həmçinin Azərbaycanın "Vətən" "Xəzər-Lənkəran" və "İmişli" klublarında çıxış edib. Polşada futbol karyerası ərzində "Orły Bojszòw Zabrze", "Wiarusy Igoami Krakow" klublarında oynayıb. Hazırda karyerasını "Orzeł Iwanowice" klubunda davam etdirir, həm böyük futbol, həm minifutbol oynayır. Pərvin Nəcəfov və Heydər Qurbanov da ölkəmizin uşaq futbolunda forma geyiniblər. Təbii ki, biz daha çox Azərbaycan yığmasında və klublarında oynamış oyunçuları komandamıza cəlb etmək istərdik. Ümid edirəm ki, gələcəkdə də bunu reallaşdıra biləcəyik. Amma biz gənc və potensialı yüksək olan oyunçuların tanınmasının tərəfdarıyıq. Çünki əsas niyyətimiz Polşa futboluna azərbaycanlı oyunçular qatmaqdır. Həmçinin peşəkar futbolda da ölkəmizi təmsil etmək istəyərik.

- Əsasən azərbaycanlılardan ibarət komandanızın heyətinə legionerlər də cəlb olunubmu?

-Komandamız əsasən azərbaycanlılardan ibarət olsa da heyətimizdə Ukrayna, Polşa, Misir və Kolumbiyadan olan əcnəbilər də var. Polşalı 3 oyunçumuz minifutbol üzrə Polşa millisində hazırda da çıxış edirlər. Həqiqətən də çox yaxşı kollektivimiz var. Komandada hər kəs bir-birinə uyğunlaşmağı bacarır. Legionerlərimiz də bizim mədəniyyətimizi çox sevirlər. Sevindiricidir ki, biz də bu sayədə onların adət-ənənələrini və mədəniyyətini öyrənmiş oluruq.

-Varşavadakı qələbə sayəsində Polşanı Yunanıstanda keçiriləcək minifutbol üzrə Çempionlar Liqasında təmsil edəcəksiniz. Bu turnirdə əsas hədəflər nələr olacaq?

-Polşa Liqasında çempion olduğumuz üçün bu ölkəni təmsil edəcəyik. Əfsuslar olsun ki, Azərbaycanı təmsil edə bilmirik. Mən istəyərdim ki, Azərbaycanın minifutbol milli komandası və minifutbol klubları ilə aramızda sıx əlaqələr olsun. Çünki həqiqətən də Çempionlar Liqasında oynaya biləcək gənc, istedadlı oyunçularımız çoxdur. Bu, çox önəmli turnirdir, çünki burada fərqli ölkələri təmsil edəcək ən güclü komandalar mübarizə aparacaqlar. Yunanıstanda keçiriləcək Çempionlar Liqası minifutbol turniri dünyada populyar və yüksək səviyyəli turnir olduğu üçün, yüksək dərəcədə xərclər də tələb edir. Biz orada həm Polşa, həm də Azərbaycan adından çempion olmağı arzulayırıq.