Postmüharibə dövründə reabilitasiya müəssisələrində 2700-dən çox müharibə veteranına reabilitasiya xidmətləri göstərilib
Bakı, 27 aprel, AZƏRTAC
Aprelin 27-də Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyi Şağan Reabilitasiya Pansionatına mediatur təşkil edib.
AZƏRTAC xəbər verir ki, kütləvi informasiya vasitələrinin (KİV) nümayəndələri mərkəzdə əlilliyi olan şəxslərə, eləcə də 44 günlük Vətən müharibəsi ilə əlaqədar əlilliyi olan şəxslərə göstərilən tibbi və sosial-psixoloji reabilitasiya xidmətləri ilə tanış olublar.
Bildirilib ki, Prezident İlham Əliyevin tapşırığına uyğun olaraq son illər reabilitasiya infrastrukturunun müasir tələblərə uyğun qurulması və Qəbələdə Uşaq Reabilitasiya Mərkəzinin yaradılması təmin edilib. Nəticədə reabilitasiya xidmətlərinin keyfiyyətinin yüksəldilməsi ilə yanaşı, reabilitasiya potensialının dəfələrlə artmasına nail olunub.
Qeyd olunub ki, agentliyin tabeliyində Bakıda və ölkəmizin regionlarında olmaqla 14 reabilitasiya müəssisəsi və 1 Protez-Ortopedik Reabilitasiya Mərkəzi fəaliyyət göstərir. Həmin müəssisələr 44 günlük Vətən müharibəsində yaralanmış hərbçilərimizin səmərəli bərpa müalicəsi xidmətləri ilə təminatında mühüm rola malikdirlər.
Agentliyin reabilitasiya müəssisələrində bu ilin yanvar-mart aylarında əlilliyi olan 14 min 722 şəxsə xidmətlər göstərilib. İlin birinci rübündə əlilliyi olan 3 min 547 şəxsə isə 19 min 939 reabilitasiya vasitəsi verilib.
Media nümayəndələrinə məlumat verilib ki, postmüharibə dövründə agentliyin reabilitasiya müəssisələrində 2700-dən çox müharibə veteranına sosial-psixoloji və reabilitasiya xidmətləri göstərilib. Bu dövrdə müharibə ilə əlaqədar əlilliyi olan 1900-dən çox şəxs 35 mindən artıq reabilitasiya vasitəsi, I və II Qarabağ müharibəsində yaralanaraq aşağı və yuxarı ətrafları amputasiya olunmuş ümumilikdə 411 hərbçi yüksək texnologiyalı son nəsil 428 protezlə təmin edilib.
KİV nümayəndələri mərkəzdə yaradılan şəraitlə, əlilliyi olan şəxslərə, həmçinin müharibə ilə əlaqədar əlilliyi olan şəxslərə göstərilən reabilitasiya xidmətləri, burada tətbiq olunan fizioterapevtik müalicə prosedurları ilə tanış olublar.
Bölmənin digər xəbərləri
