Premyer Liqa: “Zirə” klubu autsayderlə oyunda xal itirib
Bakı, 21 oktyabr, AZƏRTAC
Futbol üzrə Azərbaycan Premyer Liqasında X turun daha bir oyunu keçirilib.
AZƏRTAC xəbər verir ki, “Kəpəz” komandası “Zirə” ilə qarşılaşıb. Gəncə şəhər stadionu yenidən inşa olunacağı üçün “sarı-göylər” rəqibini Tovuzda qəbul edib. Qarşılaşma qolsuz bərabərliklə yekunlaşıb.
Bu nəticədən sonra xallarını 20-yə çatdıran “qartallar” yenidən ilk pilləyə yüksəlib. Altıncı xalını qazanan “Kəpəz” isə sonuncu - 10-cu sırada qərarlaşıb.
Günün digər oyunu “Sabah” və “Sumqayıt” komandaları arasında olacaq. “Bank Respublika Arena”da keçiriləcək görüş saat 18:00-da başlayacaq.
Qeyd edək ki, turun əvvəlki oyunlarında “Qarabağ” səfərdə “Turan Tovuz”la 2:2 hesablı heç-heçə edib, “Neftçi” isə “Səbail”ə qalib gəlib - 4:2.
Bölmənin digər xəbərləri
