Premyer Liqada mövsümün məhsuldarlıq rekordu yenilənib
Bakı, 23 oktyabr, AZƏRTAC
Azərbaycan Premyer Liqasında cari mövsümün X turunda son 23 ayın rekordu qeydə alınıb.
AZƏRTAC Peşəkar Futbol Liqasının rəsmi saytına istinadən xəbər verir ki, üç gün ərzində keçirilən 5 oyunda 19 top vurulub.
“Səbail” - “Neftçi” (2:4) matçında 6, “Qəbələ” - “Araz-Naxçıvan”(1:4) görüşündə 5, “Turan Tovuz” - “Qarabağ” (2:2) və “Sabah” - “Sumqayıt” (3:1) qarşılaşmalarının hərəsində 4 qol qeydə alınıb. Yalnız “Kəpəz” - “Zirə” oyunu qolsuz bitib - 0:0.
Bir turda 19 qolun vurulması təkcə mövsümün deyil, 10 komandanın mübarizə apardığı son iki çempionatın mütləq rekordudur. Orta məhsuldarlıq 3,80-ə bərabər olub.
Ölkə çempionatları tarixində daha yüksək məhsuldarlığa sonuncu dəfə 2021-ci ilin noyabrında təsadüf olunub. 2021/22 mövsümünün X turunda keçirilən 4 matçda 17 qol vurulub. Həmin vaxt məhsuldarlıq 4,25-ə bərabər olub.
Noyabrın 6-7-si tarixlərində keçirilən turda “Sabah” - “Zirə” (3:3), “Şamaxı” - “Neftçi” (3:2), “Səbail” - “Qəbələ” (0:2) və “Sumqayıt” - “Qarabağ” (0:4) görüşləri keçirilib.
Qeyd edək ki, bunadək cari mövsümün rekordu 15 qolun vurulduğu I turda qeydə alınmışdı.
Bölmənin digər xəbərləri
