PREZİDENT İLHAM ƏLİYEV APRELİN 5-DƏ XALQ ŞAİRİ QABİLLƏ VİDALAŞMA MƏRASİMİNDƏ İŞTİRAK ETMİŞDİR
Aprelin 5-də ölkəmizin ictimaiyyəti müasir Azərbaycan ədəbiyyatının tanınmış nümayəndəsi, Dövlət mükafatları laureatı, əməkdar incəsənət xadimi, Azərbaycan Respublikası Prezidentinin fərdi təqaüdçüsü, xalq şairi Qabili (Qabil İmamverdiyevi) son mənzilə yola salmışdır.Mərhumun cənazəsi Azərbaycan Dövlət Mahnı Teatrının matəmsayağı bəzədilmiş səhnəsində postament üzərinə qoyulmuşdu. Postamentin ətrafına Azərbaycan Prezidenti İlham Əliyevin adından, habelə dövlət və hökumət təşkilatları, Yazıçılar Birliyi, müxtəlif kollektivlər adından əklillər və mərhumun orden və medalları düzülmüşdü.
Xalq şairi Qabilin həmkarları, dostları, tanışları, tanınmış mədəniyyət və incəsənət, elm xadimləri, mərhumun poeziyasının pərəstişkarları axın-axın teatrın binasına gəlir, görkəmli sənətkara və gözəl insana son borclarını verirdilər.
Salonda həzin matəm musiqisi səslənirdi. Dövlət və hökumət nümayəndələri, elm, incəsənət, mədəniyyət xadimləri və digər sakinlər cənazənin yanında fəxri qarovulda dayanırdılar.
Azərbaycan Respublikasının Prezidenti İlham Əliyev poeziyamızın tanınmış simalarından biri olan Qabil ilə vidalaşma mərasimində iştirak etmək üçün teatra gəldi.
Prezident İlham Əliyev, Baş nazir Artur Rasizadə, Milli Məclisin sədri Oqtay Əsədov, Prezidentin İcra Aparatının rəhbəri Ramiz Mehdiyev mərhumun cənazəsi yanında fəxri qarovulda dayandılar.
Sonra dövlətimizin başçısı şairin ailə üzvlərinə, qohum-əqrəbasına dərin hüznlə başsağlığı verdi.
Matəm mitinqini Baş nazirin müavini Elçin Əfəndiyev açaraq, mərhum şairin həyat və yaradıcılığından danışdı. Bildirildi ki, ötən əsrin 40-cı illərində ədəbiyyata gəlmiş Qabilin bir çox əsərləri xalqın yaddaşına həkk olunmuş, XX əsr Azərbaycan poeziyasının ən layiqli nümunələrinə çevrilmişdir. “Nəsimi” poeması ilə klassikləşən mərhum şair yaradıcılığı ərzində bütün varlığı ilə azərbaycançılıq ideyası ilə yaşamış, xalqını, millətini, Vətənini, dövlətini, Prezidentini sevmiş, insanlara sədaqətli olmuşdur.
E.Əfəndiyev tanınmış şairin ulu öndər Heydər Əliyevlə əsl dostluğundan, ulu öndərin ona göstərdiyi qayğıdan danışaraq dedi ki, dövlətimiz Qabilin ədəbi fəaliyyətini yüksək qiymətləndirmiş və o, ölkəmizin ali mükafatları ilə təltif olunmuşdur.
Yazıçılar Birliyinin sədri Anar, mədəniyyət və turizm naziri Əbülfəs Qarayev, AMEA-nın Nizami adına Ədəbiyyat İnstitutunun direktoru, akademik Bəkir Nəbiyev, Milli Məclisin deputatı, xalq şairi Sabir Rüstəmxanlı və xalq şairi Zəlimxan Yaqub nikbin şairə Allah-təaladan rəhmət diləyərək vurğuladılar ki, o, təkcə yazdığı şeirlərlə deyil, yüksək şəxsi keyfiyyətləri, şux zarafatları ilə də insanların qəlbində əbədi məhəbbət qazanmışdır.Bildirildi ki, Azərbaycanın kədərli və sevincli anlarını “Tramvay parka gedir”, “Yağışlı havalarda”, “Səhv düşəndə yerimiz”, “Cırtdan”, “Məhəbbət”, digər məzmunlu şeirləri və “Ömür həbləri” romanı ilə qələmə almış Qabil olduqca şərəfli ömür və yaradıcılıq yolu keçmiş, həyat həqiqətlərini özünə xas olan üslubda əks etdirmişdir. Xasiyyətindəki humanizm və mərhəmət duyğusu şairi hamı ilə doğmalaşdırmışdı. Onun şeirləri hər zaman dillərdə əzbər dolaşır, ürəklərə və beyinlərə saf düşüncələr gətirir. Məhz buna görə də Qabilin vəfatı bənzərsiz şair itkisidir.
Çıxış edənlər vurğuladılar ki, Azərbaycanın zəngin poeziya ənənələrindən bəhrələnən Qabil özünün uca və həmişə təravətli olan söz dünyasını yaratmış və o, heç vaxt sözün düzünü deməkdən çəkinməmişdir. Kamil insan olan Qabilin dostluğunun mayası səmimiyyətlə yoğrulmuşdu. Elə buna görə də Azərbaycan mədəniyyətinin, ədəbiyyatının inkişafına daim böyük diqqət və qayğı göstərmiş ümummilli liderimiz Heydər Əliyev mərhum şairin şəxsiyyətinə və yaradıcılığına xüsusi hörmət bəsləmiş, onun ədəbiyyatdakı rolunu yüksək dəyərləndirmişdir. İlhamlı şair, əqidəli vətəndaş, etibarlı dost və müdrik ağsaqqal olan Qabilin parlaq xatirəsi heç zaman unudulmayacaqdır.
Natiqlər dedilər ki, lirik şeirləri, qəzəlləri, rübailəri, nəsr və publisistik kitabları hamı tərəfindən sevilən, yaradıcılığının bir sıra mühüm cəhətləri ilə nadir sənətkar olan, ədəbiyyatımıza yeni ab-hava gətirən Qabil şeirin demokratikləşməsi uğrunda mübarizə aparmış, xalqın mənəvi tərbiyəsində çox mühüm rol oynamış, keçmiş SSRİ rəhbərlərini xalqımızın başına gətirilən müsibətlərə görə kəskin ittiham etmişdir.
Mərhum şairin oğlu Mahir İmamverdiyev atasının yaradıcılığına verilən yüksək qiymətə, onun ruhuna göstərilən ehtirama görə dövlətimizin başçısına və Qabil poeziyasını sevən bütün insanlara təşəkkürünü bildirdi.
X X X
Prezident İlham Əliyev mərhumun ailə üzvlərinə bir daha dərin hüznlə başsağlığı verdi, onlara Tanrıdan səbir dilədi.
Qabilin ailə üzvləri, qohumları mərhumla vidalaşdılar.
X X X
Xalq şairi Qabilin cənazəsi teatrın binasından qaldırılaraq Fəxri xiyabana gətirildi. Burada mərhumun ruhuna dua oxundu. Əziz xatirəsi xalqımızın qəlbində əbədi yaşayacaq tanınmış sənətkar, əsl vətəndaş və gözəl insan Qabil Allahverdi oğlu İmamverdiyevin cənazəsi doğma torpağa tapşırıldı. Məzarı üzərinə əklillər, gül dəstələri düzüldü.
Allah rəhmət eləsin, qəbri nurla dolsun!
Bölmənin digər xəbərləri
