PREZİDENT İLHAM ƏLİYEV ƏLİLLƏRƏ VƏ ŞƏHİD AİLƏLƏRİNƏ YENİ MƏNZİLLƏRİN ORDERLƏRİNİ TƏQDİM ETMİŞDİR
AZƏRTAC-ın müxbiri xəbər verir ki, Azərbaycan Prezidenti İlham Əliyev avqustun 18-də Oğuz rayonunda əlillər və şəhid ailələri üçün tikilmiş yaşayış binasının sakinlərinə yeni mənzillərin orderlərini təqdim etmişdir.
Əlillər və şəhid ailələrinin üzvləri Prezident İlham Əliyevi böyük sevinclə qarşıladılar.
Azərbaycan Prezidentinə məlumat verildi ki, regionların sosial-iqtisadi inkişafı Dövlət proqramı çərçivəsində əsasən büdcə vəsaiti hesabına tikilmiş binada sahəsi 61 kvadratmetr olan altı üçotaqlı və sahəsi 52 kvadratmetr olan altı ikiotaqlı mənzil var. Tikinti işləri “Oğuz tikintimexanizasiya” Açıq Səhmdar Cəmiyyəti tərəfindən görülmüşdür.
Dövlətimizin başçısı İLHAM ƏLİYEV yeni mənzillərin orderlərini təqdim etdikdən sonra sakinlər qarşısında çıxış edərək dedi:
- Ötən müddət ərzində qəbul edilmiş qərarlar, müharibədə iştirak etmiş insanların sosial məsələlərinin həlli bizim siyasətimizdə çox böyük yer tutur. Bu, bizim hamımızın borcudur, Azərbaycan dövlətinin borcudur. Azərbaycan Respublikasının Prezidenti kimi, Ali baş komandan kimi mən bu məsələlərə daim diqqət göstərirəm.
Bu gün ordu quruculuğuna böyük diqqət göstərilir. Bilirsiniz ki, biz hərbi xərclərə böyük diqqətlə yanaşırıq və hərbi büdcəmiz ildən-ilə artır. Hərbi büdcəmiz bu il 76 faiz artıb və 300 milyon dollar təşkil edir. Gələn il də gərək ən azı eyni templə artsın. Çünki biz müharibə şəraitində yaşayırıq, torpaqlarımız işğal altındadır. Çalışırıq ki, münaqişəni danışıqlar yolu ilə həll edək. Amma görürsünüz ki, heç bir nəticə yoxdur. Ona görə biz hər şeyə hazır olmalıyıq. Gərək bizim hərbi potensialımız güclənsin və Ermənistanın hərbi potensialından bir neçə dəfə üstün olsun. Biz buna nail olacağıq.
Eyni zamanda, müharibədə iştirak etmiş, öz sağlamlığını itirmiş insanlara, şəhid olmuş insanların ailələrinə daim diqqət göstərilməlidir. Bizim maddi imkanımız yaxşılaşdıqca, büdcəmiz artdıqca bu məsələlərə daha böyük həcmdə vəsait ayrılacaqdır. Belə evlər çox tikiləcəkdir. Müharibədə iştirak etmiş hər bir insan böyük diqqət və qayğıya layiqdir. Əlimizdən gələni edirik ki, onların cəmiyyətdə yaşamasına onların işlə təmin olunmasına kömək göstərək. Ona görə mən çox şadam ki, bu gün evin, mənzilərin orderlərini sizə şəxsən təqdim edirəm. Ümidvaram ki, siz bu mənzilərdə yaxşı yaşayacaqsınız, xoşbəxt yaşayacaqsınız və gələcək nəsillərin vətənpərvərlik ruhunda tərbiyə olunmasında rolunuzu oynayacaqsınız.
Sonra dövlətimizin başçısı yeni mənzillərlə tanış oldu. Mənzil almış hər bir ailəyə Prezident İlham Əliyevin adından rəngli televizor hədiyyə edildi.
Yeni mənzillərin sakinləri ümummilli lider Heydər Əliyevin xəttinin layiqli davamçısı Prezident İlham Əliyevə təşəkkür etdilər, fəaliyyətini hər sahədə dəstəklədiklərini bildirdilər.
Bölmənin digər xəbərləri
