Prezident İlham Əliyev: Ermənistan Azərbaycanın ərazi bütövlüyünü tanımaq istəmir
Bakı, 15 dekabr, AZƏRTAC
Mən dəfələrlə açıq bəyanat vermişəm ki, Azərbaycan Ermənistanla sülh danışıqlarına və sülh razılaşması üzərində işləməyə başlamağa hazırdır. Bu vaxta kimi Ermənistan rəhbərliyindən heç bir cavab verilməyib.
AZƏRTAC xəbər verir ki, bunu Prezident İlham Əliyev İspaniyanın “El Pais" qəzetinə müsahibəsində real sülh sazişi barədə sualı cavablandırarkən bildirib.
Azərbaycan Prezidenti qeyd edib ki, Ermənistan rəhbərliyinin bəyanatları onların sülh istəmədiyini göstərir. Çünki imzalandığı təqdirdə sülh razılaşmasının əsas müddəalarından biri də hər iki ölkənin ərazi bütövlüyünün qarşılıqlı tanınması olacaq və Ermənistan Azərbaycanın ərazi bütövlüyünü tanımaq istəmir.
“Bütün dünya Azərbaycanın ərazi bütövlüyünü və Qarabağı Azərbaycanın ayrılmaz hissəsi kimi tanıyır. Ermənistan nə ərazi bütövlüyünü tanıdığını, nə də tanımadığını söyləyir. İkinci Qarabağ müharibəsindən əvvəl onlar deyirdilər və onların baş naziri açıq şəkildə bildirmişdi ki, “Qarabağ Ermənistandır və nöqtə”. Bu bəyanat, əslində, danışıqlar prosesini məhv etdi və onların keçən il yaşadığı acı məğlubiyyətin elementlərindən biri idi. Lakin indi Ermənistanın sanki bu məsələ ilə bağlı heç bir mövqeyi yoxdur”, - deyə Prezident İlham Əliyev vurğulayıb.
Dövlətimizin başçısı ümid etdiyini bildirib ki, yəqin Avropa tərəfdaşları Ermənistanı bu mövqeyinin gələcəyinin olmamasına inandıra biləcəklər. Azərbaycanla sülh razılaşması olmazsa, onlar gələcəkdə yenə də əziyyət çəkə bilərlər.
Bölmənin digər xəbərləri
