Prezidentin köməkçisi: Qabaqlayıcı tədbirlər nəticəsində ölkəmizdə epidemioloji vəziyyət nəzarət altındadır
Bakı, 16 aprel, AZƏRTAC
Xüsusi karantin rejiminin uzadılması ilə əlaqədar zəruri tədbirlər görülür. Hazırda ölkəmizin aidiyyəti qurumlarının rəyləri, təklifləri, o cümlədən sanitar-epidemioloji vəziyyət təhlil edilir. Bunun əsasında da karantin rejiminin uzadılması və onun qaydaları ilə bağlı qərar barədə ictimaiyyətə ətraflı məlumat veriləcək.
AZƏRTAC xəbər verir ki, bu sözləri Nazirlər Kabineti yanında Operativ Qərargahın brifinqində Azərbaycan Prezidentinin köməkçisi-Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.
Hikmət Hacıyev bildirib ki, qərar verilərkən dünyada gedən proseslər də nəzərə alınır. Azərbaycanda vəziyyətin müsbət istiqamətə doğru getməsi heç də dünyada vəziyyətin belə olması demək deyil. Bu, o deməkdir ki, infeksiyanın yenidən xaricdən idxal olunması halları baş verə bilər. Karantin rejiminin həyata keçirilməsi avtomatik xarakter daşımır. Burada əsas məqsəd vətəndaşların sağlamlığıdır.
Prezidentin köməkçisi dövlətimizin həyata keçirdiyi zəruri və qabaqlayıcı tədbirlər nəticəsində epidemioloji vəziyyətin nəzarət altında olduğunu da diqqətə çatdırıb.
Bölmənin digər xəbərləri
