Prokurorluq Kür çayında boğularaq ölən vətəndaşla bağlı məlumat yayıb
Bakı, 19 iyun, AZƏRTAC
Prokurorluq Kür çayının Sabirabad rayonu ərazisindən keçən hissəsində itkin düşən şəxsin meyitinin tapılması ilə bağlı məlumat yayıb.
Sabirabad Rayon Prokurorluğunun AZƏRTAC-a daxil olan məlumatında bildirilib ki, iyunun 18-də saat 17 radələrində Kür çayının Sabirabad rayonunun Bulduq kəndi ərazisindən keçən hissəsində 2006-cı il təvəllüdlü Emil Məmmədovun çimərkən boğularaq ölməsi və meyitinin itkin düşməsi barədə rayon prokurorluğuna məlumat daxil olub.
Prokurorluq əməkdaşları tərəfindən dərhal hadisə yerinə baxış keçirilib, izahatlar alınıb və digər zəruri prosessual hərəkətlər yerinə yetirilib.
E.Məmmədovun meyitinin aşkar edilməsi istiqamətində Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Xidmətinin Muğan dalğıc-axtarış qrupu tərəfindən dərhal axtarışlara başlanılıb və meyit iyunun 19-da aşkarlanaraq müayinə olunması üçün Səhiyyə Nazirliyinin Məhkəmə Tibbi Ekspertiza və Patoloji Anatomiya Birliyinin Sabirabad rayon şöbəsinə təhvil verilmişdir.
Hazırda faktla bağlı araşdırmalar davam etdirilir.
Bölmənin digər xəbərləri
