Qadınlar gündə 3600 addım atmaqla ürək çatışmazlığı riskini azalda bilərlər
Bakı, 27 fevral, AZƏRTAC
Araşdırmaya əsasən qadınlar ürək çatışmazlığı riskini azaltmaq üçün düşündüklərindən daha az gəzintiyə ehtiyac duyurlar.
AZƏRTAC “Healthday” saytına istinadla xəbər verir ki, alimlərin məsləhətinə görə, insanlar sağlam qalmaq üçün gündə 10 min addım atmalıdırlar. Lakin 60 yaşdan yuxarı qadınlar gündəlik təxminən 3600 addım atmaqla sağlam ürəyə sahib ola bilərlər.
Araşdırmanın nəticələri göstərir ki, orta hesabla normal tempdə gündə 3600 addım ürək çatışmazlığı riskini 26 faiz azaldır.
Tədqiqatçılar 63 yaşdan yuxarı təxminən 6 min amerikalı qadının məlumatlarını təhlil ediblər. Tədqiqat iştirakçıları yeddi gün ardıcıl olaraq gündəlik orta hesabla 3600 addım atıblar. Nəticələr göstərib ki, ürək çatışmazlığı riski yüngül məşqlərə sərf olunan hər 70 dəqiqə üçün 12 faiz, orta və intensiv məşqlərə sərf olunan hər 30 dəqiqə üçün 16 faiz aşağı düşüb. Oturaq həyat tərzi isə ürək çatışmazlığı riskini 17 faiz artırır.
Alimlər qadınların hərəkətdən fayda əldə etmək üçün intensiv məşqlərə ehtiyaclarının olmadığını, daha az gəzinti ilə də sağlam qalacaqlarını bildiriblər.
Bölmənin digər xəbərləri
