“QAFQAZ EVİ” YARDIM GÖSTƏRƏCƏYİNİ VƏD EDİR
Almaniyanın Henrix Böll Fondunun sponsorluğu ilə Tbilisidə yaradılan “Qafqaz evi” qarşılıqlı mədəni əlaqələr mərkəzi ölkədə yaşayan azsaylı xalqların mədəni-ədəbi problemləri ilə ciddi məşğul olur və onların həllinə imkanı daxilində kömək edir.
Gürcüstanda yaşayan soydaşlarımızın ziyalı nümayəndələri ilə bu günlərdə “Qafqaz evi”ndə keçirilmiş görüşdə bu problemlərdən bəhs edildi.
Görüşdə Gürcüstan Prezidentinin İcra aparatının regional siyasət və idarəetmə xidməti rəisinin müavini İmir Məmmədli, “Gürcüstan” qəzetinin baş redaktoru Süleyman Süleymanov, onun müavini İslam Əliyev, professor Valeh Hacıyev, filologiya elmləri namizədi Şurəddin Məmmədli, Gürcüstan Azərbaycanlı Qadınlar İttifaqının sədri Leyla Süleymanova, Azərbaycan mədəniyyəti mərkəzinin direktoru Məmməd Gülməmmədov və başqaları çıxış edərək, ziyalı soydaşlarımızın qarşılaşdıqları problemlərdən, onların həlli üçün Prezident Eduard Şevardnadzenin və Azərbaycan Prezidenti Heydər Əliyevin qayğı və diqqəti sayəsində görülmüş işlərdən söhbət açdılar. Bununla yanaşı, bəzi məsələlərin, ilk növbədə, “Gürcüstan” qəzetinin nəşri, ölkə radiosunun Azərbaycan dilində verilişlərinin geniş yayımlanmaması, bir çox elmi və ədəbi əsərlərin gürcü və Azərbaycan dillərinə təcrüməsi ilə bağlı məsələlərin hələ də öz həllini gözlədiyi vurğulandı.
Mərkəzin direktoru Naira Gelaşvili bu məsələlərin həlli üçün ayrıca bir layihə hazırlamağı təklif edərək söz verdi ki, Henrix Böll Fondundan maddi yardım ayrılmasına çalışacaqdır.
Şahismayıl Məmmədov
AZƏRTAC -ın xüsusi müxbiri
Tbilisi
Bölmənin digər xəbərləri
