Qanunları pozanlar cəmiyyət və dövlət tərəfindən layiqli cəzalarını aldılar
Bakı, 23 avqust, Səadət Hakıyeva, AZƏRTAC
Bu günlərdə bəzi vəzifəli şəxslərin, məmurların toy mərasimləri təşkil etməsi və bu mərasimlərdə tanınmış şəxslərin iştirakı cəmiyyət tərəfindən ciddi qınaq obyektinə çevrildi. Bu qanunsuz əməli törədən və həmin tədbirdə iştirak edən şəxslər cəmiyyət və dövlət tərəfindən layiqli cəzalarını aldılar. Qanunlar hər bir şəxs üçün eyni qüvvəyə malikdir. Tanınmış və vəzifəli şəxslər qanunların tələblərinə daha ciddi formada riayət etməldirlər.
Bu fikirləri AZƏRTAC-a açıqlamasında “İnformasiya Təşəbbüslərinə Dəstək” İctimai Birliyinin sədri Cəsarət Hüseynzadə bildirib.
QHT sədri diqqətə çatdırıb ki, pandemiya şəraitində digər ölkələr kimi, Azərbaycanın da iqtisadi gəlirləri azalıb. İqtisadi itkilərə baxmayaraq, Prezident İlham Əliyevin göstərişi ilə dövlətin siyasətinin prioritetini ölkə vətəndaşlarının sağlamlığının qorunması təşkil etdi. Pandemiyanın yaratdığı fəsadları aradan qaldırmaq və vətəndaşlara dəstək məqsədilə dövlət büdcəsindən milyardlarla manat vəsait xərcləndi və bu proses davam etməkdədir. Vətəndaşlara təkcə sosial yardım kimi 333 milyon manat birdəfəlik yardım edilib. Dövlət tərəfindən atılan bu addımlarla bərabər, eyni zamanda, COVID-19-un yayılmasının qarşısının alınması üçün müvafiq qaydalar müəyyən edilib. Dövlət tərəfindən atılan bu addımların davamı olaraq, karantin qaydalarının pozulmasının qarşısının alınmasına nəzarət də ciddi formada təşkil olunub.
“Kimlərinsə qoyulan bu qaydaları pozması yolverilməzdir. Dövlətimizin başçısı dəfələrlə bu məsələyə münasibət bildirərək qeyd edib ki, hansısa şəxslərin məsuliyyətsiz davranışına yol vermək olmaz. Çox təəssüf ki, bəzi vəzifəli şəxslər koronavirusla mübarizənin ümummilli məsələ olduğunu unudaraq şəxsi mənafeyi naminə tutduğu mövqeyə, vəzifəsinə görə özünü üstün saymaqla qanunları pozmağa cəhd ediblər.
Sabiq deputatın karantin qaydalarını pozaraq övladına toy etməsi də cəmiyyətdə ciddi etirazla qarşılandı. Qanunların pozulması ilə yanaşı, cəmiyyətə qarşı açıq hörmətsizliyi əks etdirən bu addımı atanlar dövlət tərəfindən lazımi qaydada cəzalandırıldı. Həmçinin bu mərasimdə iştirak edən vəzifəli şəxslər də epidemiya əleyhinə rejimin, sanitariya-gigiyena və karantin qaydalarını pozduqları üçün müvafiq qurumlar tərəfindən haqlı olaraq cərimələndilər”, - deyən QHT sədri qeyd edib ki, Azərbaycan hüquqi dövlətdir, ölkəmizdə qanunun aliliyi təmin edilib, heç kim qanundan üstün deyil. Azərbaycan Prezidenti ölkədə qanunun aliliyinin qarantıdır, hər kəsin qanun qarşısında məsuliyyəti və cavabdehliyi ali iradənin tələbidir. Bu baxımdan heç bir vəzifəli şəxs öz statusundan istifadə edərək qanunları poza və onların tələblərinə hörmətsiz yanaşa bilməz. Belə şəxslər də müəyyən olunduqda mütləq şəkildə məsuliyyətə cəlb edilir, onların barəsində cəza tədbirləri görülür və qarşıdan gələn dövrdə bu tədbirlər daha da sərtləşdiriləcək.
“Qanunu pozanlar başa düşməlidirlər ki, baş verənlərə görə hüquqi məsuliyyətlə yanaşı, mənəvi məsuliyyət də daşıyırlar. Çox təəssüf hissi ilə qeyd edirəm ki, cəmiyyət həmin şəxslərdən nümunəvi davranış gözlədiyi halda, onların bu məsuliyyətsiz hərəkəti insanlarda haqlı narazılığa səbəb oldu. Sevindirici haldır ki, ölkə rəhbərliyinin qətiyyətli mövqeyi sayəsində hər bir şəxsin qanun qarşısında bərabərliyi, vətəndaş-dövlət birliyi təmin olunur”, - deyə Cəsarət Hüseynzadə fikirlərini yekunlaşdırıb.
Bölmənin digər xəbərləri
