Qarabağ Zəfərinin Türk dünyası ölkələrinin daha da yaxınlaşmasında çox böyük rolu oldu - ŞƏRH
Bakı, 7 noyabr, AZƏRTAC
Noyabrın 6-da Qırğızıstanda mühüm hadisə - Türk Dövlətləri Təşkilatının XI Zirvə Toplantısı keçirildi. Əvvəlki Zirvə görüşlərinin bilavasitə şahidi olduğum, Türk inteqrasiya proseslərində yaxından iştirak etdiyim üçün əminliklə deyə bilərəm ki, Qarabağ Zəfərinin Türk dünyası ölkələrinin daha da yaxınlaşmasında, onlar arasında həmrəyliyin daha da gücləndirilməsində çox böyük rolu oldu.
Bu sözləri AZƏRTAC-a açıqlamasında Milli Məclisin deputatı Günay Əfəndiyeva deyib.
Azərbaycan Respublikasının Prezidenti İlham Əliyevin “Bizim ailəmiz - Türk dünyasıdır” ifadəsinə diqqət çəkən Günay Əfəndiyeva vurğulayıb ki, bu sözlər Zəfər Günü ərəfəsində də böyük əhəmiyyət daşıyır. Deputat Azərbaycanın Vətən müharibəsində əldə etdiyi Qələbə ilə yalnız öz torpaqlarını deyil, həm də Türk dünyasının zəngin, qədim dəyərlərini, çoxəsrlik irsini qoruduğunu bildirib.
O qeyd edib ki, türk ölkələrinin dövlət başçılarının Qarabağa səfərləri, Türkiyə ilə Şuşa Bəyannaməsinin imzalanması, Füzulidə Özbəkistanın inşa etdiyi Mirzə Uluqbəy adına 1 nömrəli tam orta məktəbin, Qazaxıstan tərəfindən tikilən Kurmanqazı adına Uşaq Yaradıcılıq Mərkəzinin açılması, eləcə də Qırğızıstanın Ağdamın Xıdırlı kəndində, Macarıstanın Cəbrayıl rayonunda orta məktəblərin inşasında iştirakı türk xalqlarının birliyini, həm də beynəlxalq həmrəyliyimizi bir daha sübut edir.
“Keçən il Şuşa Türk dünyasının mədəniyyət paytaxtı elan olundu. Bu il isə Prezident İlham Əliyevin təşəbbüsü ilə Şuşanın qapıları Türk Dövlətləri Təşkilatının Dövlət Başçılarının qeyri-rəsmi Zirvə görüşünə açıldı, Qarabağ Bəyannaməsi imzalandı. Bir tərəfdən Şuşa və ümumilikdə Qarabağ Türk dünyasının ciddi siyasi platformasına çevrilir. Digər tərəfdən isə Azərbaycan ikitərəfli, eləcə də çoxtərəfli görüşlərlə kifayətlənmir. Dostluğu, qardaşlığı təcəssüm edən görüşlər keçirir. Beləliklə, Qarabağ Şuşa daxil olmaqla, həm siyasi-ictimai, həm də mədəni-mənəvi baxımdan birləşdirici qüvvə kimi aktiv rol oynayır”, - deyə deputat vurğulayıb.
Günay Əfəndiyeva 8 Noyabr - Zəfər Gününün yalnız Azərbaycanın deyil, bütün Türk dünyasının bayramı olduğunu qeyd edərək deyib: “Qarabağda, Şuşada yaşadığımız qələbə türk dövlətləri üçün də qürurvericidir. İnanıram ki, ortaq soy-kök, tarix, mənəvi dəyərlər ətrafında sıx birləşən, həmrəyliyə, qarşılıqlı dəstəyə söykənən güclü və möhkəm bir ailə olaraq, Türk dünyası gələcəkdə neçə-neçə böyük uğura imza atacaq”.
Bölmənin digər xəbərləri
