“QAZ-69”u ən yaxşı minik maşınları sırasında olan həmyerlimiz: Yenidən yürüşlərə qatılmağı planlaşdırıram
Bakı, 30 aprel, AZƏRTAC
Həmyerlimiz Aleksandr Semixov avtomobillərə hələ uşaq yaşlarından maraq göstərib. Bakının Nizami rayonunda yaşayan A.Semixov AZƏRTAC-ın müxbiri ilə söhbət zamanı bildirib ki, doqquzuncu sinifdə oxuyanda velosiped sürmək həvəsinə düşüb: “Atam yaxın dostunun evinin eyvanındakı köhnə “Desna” markalı velosipedi gətirib dedi ki, əgər bunu işlək vəziyyətə gətirə bilsən, bu həvəsinin ötəri olmadığına inanacağam. Üstündən bir ay keçməmiş velosipedi işlək vəziyyətə gətirdim. Velosiped texniki cəhətdən saz vəziyyətdə olmaqla yanaşı, görünüşünə görə də məhəlləmizdə hər kəsin diqqətini cəlb edirdi. Beləcə, avtomobillərə həvəsim velosipeddən başladı”.
Həmsöhbətimiz deyir ki, illər ötdükcə avtomobil dünyasına marağı daha da artıb.
Yenilənmiş “QAZ-69” və çətin keçilən yollar
Aleksandr Semixov “QAZ-69” markalı avtomobilə xüsusi həvəs göstərdiyini söyləyir. Bu səbəbdən, 2011-ci ildə 1965-ci ildə istehsal edilmiş həmin markadan olan avtomobilin Binəqədi qəsəbəsində satıldığını öyrənən kimi onu alıb. Bundan az sonra ona aydın olub ki, avtomobil uzun məsafəni qət etmək üçün narahatdır, texniki təkmilləşdirmə tələb edir. Buna görə də 2014-cü ildə avtomobilin oturacağını, sükanını, banını, körpüləri, ötürmələr və paylama qutularını yenisi ilə əvəz edib. Rusiya istehsalı olan, çətin yolsuzluq şəraitinə uyğunlaşdırılmış yeni təkərlər alıb. “QAZ-69”un 75 at gücündəki benzin mühərrikini Polşada istehsal edilmiş dizel mühərriki ilə əvəzləyib. Bundan sonra mühərrikin gücü 92-95 at gücünə çatıb. Ümumiyyətlə, avtomobilin rahatlığı və xarici görünüşü tamamilə dəyişib.
Avtomobil həvəskarının sözlərinə görə, “QAZ-69”la bir neçə dəfə off-road yürüşlərinin iştirakçısı olub. 2012-ci ildə Qobustan rayonunun Cəngi kəndinin, 2013-cü ildə isə Zirə qəsəbəsinin yaxınlığında keçirilən yarışlarda iştirak edib. Xızı rayonunda səmti müəyyənləşdirmə yürüşünə qatılıb. Sonuncu dəfə isə 2019-cu ilin oktyabrında təşkil olunan yarışlarda Çinarlar-Nohurlar kəndi yaxınlığında meşə yolu ilə irəliləyərkən avtomobilin qabaq körpüsü sıradan çıxıb. Yürüşü sona qədər davam etdirə bilmədiyindən “QAZ-69”u qoşqu vasitəsilə Qalaaltına, oradan da evakuatorla Bakıya gətirilib.
Bitməyən həvəs və gələcəyə ümid
Aleksandr Semixov 5 ildir ki, ağır yolsuzluq şəraitində keçirilən yürüşlərə qoşula bilmir. Buna baxmayaraq, o, avtomobilin paylayıcı qutusunu modifikasiya etməklə və dişli çarxlarını dəyişməklə, gücünü və yolsuzluq qabiliyyətini daha da artırmaq barədə düşünür. Bu prosesi uğurla başa çatdırandan sonra yenidən yürüşlərə qatılmağı planlaşdırır. Hələlik isə Aleksandrın sevimli “QAZ-69”nu klassik avtomobillərin yarışlarında görmək olur. Bu avtomobil 2018, 2019, 2023 və 2024-cü illərdə ölkəmizdə keçirilən klassik avtomobillərin yürüşlərində iştirak edib. Təsadüfi deyil ki, A.Semixovun “QAZ-69”u Rusiyanın məşhur avtomobil sosial şəbəkələrində “Drive 2” markasından olan ən yaxşı minik maşınları sırasında beşinci yerdə qərarlaşıb.
Avtomobil həvəskarı hazırda “QAZ-69”u daha çox Bilgəh, Zirə və Dübəndi yollarında idarə edir. O düşünür ki, bu avtomobil üçün ən yaxşı yolsuzluq şəraiti paytaxtın 55 kilometrliyində yerləşən Cəngi kəndinin ətrafında mövcuddur. “Yolsuzluq daha çox hava ilə bağlıdır. Bəzən yayda rahat keçilən yolları yağış yağandan sonra çox çətin gedirsən. Buna baxmayaraq, sıldırım, nahamar və kələ-kötür dağ yollarında, meşəlik ərazilərdə avtomobil idarə etməyi çox sevirəm”, - deyə o bildirir.
Aleksandrın qızı Alika bu il Bakıda keçirilən Formula 1 Azərbaycan Qran-Prisinin marşalı olub.
Yeri gəlmişkən, Aleksandr Semixovun əsas səfər yoldaşı isə dostu Roland Hüseynovdur. Onlar “4x4 off-road klubu”nun üzvləridirlər. Bu barədə danışan R.Hüseynov deyir: “Semixovun dəvəti ilə 14 il əvvəl bu kluba üzv yazılmışam. Qubanın Xınalıq, Dəhnə və Qrız, Şabranın Nohurlar kənlərində, Altıağacda və Xızı rayonunda keçilməz yolları birlikdə getmişik. Biz əsasən, avtomobilin çətin idarə edildiyi yerlərə gedirik. Bu, ikimizin də marağındadır. Aleksandrın texnikaya olan münasibəti də çox xoşuma gəlir. Onda bu işə böyük maraq var, bu sahədəki ən son yenilikləri avtomobilə tətbiq edir. Elə onun göstərdiyi diqqətin nəticədir ki, idarə etdiyi “QAZ-69”un keçdiyi yolları müasir avtomobillərin əksəriyyəti gedə bilmir. İnanıram ki, o, “QAZ-69”la yenidən yarışlarda iştirak edəcək və uğur qazanacaq”.
Bölmənin digər xəbərləri
