DÜNYA
Qazaxıstan Prezidenti milli birliyə qarşı yönələn təxribatların qarşısını almağa çağırıb
Bakı, 27 aprel, AZƏRTAC
Qazaxıstan hakimiyyəti milli birliyin və vahidliyin pozulmasına yönələn istənilən təxribatın qarşısını almalıdır.
AZƏRTAC xəbər verir ki, bu barədə Qazaxıstan Prezidenti Kasım-Jomart Tokayev Xalq Assambleyasının sessiyasında çıxışı zamanı deyib.
“Qazaxıstanın vahidliyinin və milli birliyin pozulmasına yönələn təxribatların qarşısını alınmalıdır. İctimai məkanda yayılan müxtəlif saxtakarlığın, yaxud yalan informasiyanın və destruktiv məlumatların xaricdə fəaliyyət göstərən müəllifləri cəmiyyətdə nifaq toxumu səpməyə çalışırlar”, - deyə Kasım-Jomart Tokayev vurğulayıb.
Onun sözlərinə görə, təxribatçıların ritorikası və fəaliyyəti ölkədə etimadsızlıq atmosferi yaratmağa, insanlar arasında nifaq salmağa və dövlət təhlükəsizliyini pozmağa yönəlib.
“Belə tendensiyalar nəzərə alınmaqla, kriminal və ya məişət xarakterli istənilən insident bədxahların səyləri ilə etnik müstəviyə keçə və ağır nəticələrə səbəb ola bilər”, - deyə Qazaxıstan Prezidenti əlavə edib.
Kasım-Jomart Tokayev etnik, dil və sosial zəmində baş verəcək istənilən təxribatın qarşısının qanun çərçivəsində sərt şəkildə alınacağını bildirib.