Bakı, 19 fevral, AZƏRTAC

Müasir dövrün çağırışları, - iqtisadi inkişaf, təhlükəsizlik məsələləri, iqlim dəyişikliyi və mədəni mübadilə, - yalnız çoxtərəfli əməkdaşlıq yolu ilə səmərəli şəkildə həll edilə bilər. Parlament diplomatiyası, bu kontekstdə, Asiya regionunda davamlı inkişafa nail olmaq üçün mühüm vasitə rolunu oynayır. Qazaxıstan, İqtisadi Əməkdaşlıq Təşkilatının hazırkı sədri kimi, regional təhlükəsizlik, iqtisadi inkişaf, iqlim dəyişikliyi və mədəni mübadilə sahələrində birgə səylərin gücləndirilməsinə xüsusi önəm verir.

AZƏRTAC xəbər verir ki, bu sözləri Qazaxıstan Parlamenti Senatının üzvü Altınbek Nuxulı Asiya Parlament Assambleyasının (APA) 15-ci plenar sessiyasında çıxışı zamanı söyləyib.

Onun sözlərinə görə, Qazaxıstan parlament diplomatiyanın gücləndirilməsi və çoxtərəfli əməkdaşlığın təşviqi istiqamətində mühüm addımlar atmağa davam edir, xüsusilə Parlament Assambleyası çərçivəsində dialoq və əməkdaşlıq üçün unikal bir platforma kimi fəaliyyət göstərərək, regional sabitlik və inkişaf üçün yeni imkanlar yaradır. Qazaxıstanın Şərqlə Qərbi birləşdirən strateji ərazi kimi coğrafi mövqeyi ölkənin beynəlxalq əməkdaşlıqda rolunu daha da artırır. Regional sabitliyin və iqtisadi inkişafın təmin edilməsi üçün parlament diplomatiyasının quruculuq və dialoq vasitəsilə inkişaf etdirilməsi mühüm əhəmiyyət kəsb edir. Bu çərçivədə xalqlararası diplomatiya və siyasi iradənin konkret fəaliyyətə çevrilməsi, fikir ayrılıqlarının aradan qaldırılması və mürəkkəb məsələlərin davamlı həll yollarının tapılması əsas hədəflərdən biridir.

“Son illərdə Qazaxıstanın Asiya ölkələri ilə əməkdaşlığı genişlənib. İstər İqtisadi Əməkdaşlıq Təşkilatı, istər Mərkəzi Asiya Regional İqtisadi Əməkdaşlıq Proqramı, istərsə də Asiya Parlament Assambleyası çərçivəsində həyata keçirilən təşəbbüslər regionda inteqrasiyanın dərinləşməsinə və ümumi maraqların qorunmasına xidmət edir. Bu çərçivədə Qazaxıstan çoxtərəfli əməkdaşlığı təşviq edərək, Asiya ölkələri arasında sinerji yaratmağa çalışır. Parlament diplomatiyasının fəallaşması sayəsində dövlətlərarası dialoq inkişaf etdirilir və strateji tərəfdaşlıq gücləndirilir. Bu gün Asiya ölkələri üçün iqtisadi artımla ətraf mühitin mühafizəsi arasında tarazlığın qorunması prioritet məsələlərdən biridir. Davamlı inkişafın təmin edilməsi üçün dövlətlər vahid yanaşma çərçivəsində əməkdaşlıq etməlidirlər. Eyni zamanda, Qazaxıstan regionda parlamentlərarası dialoqu daha da gücləndirməyə çalışır. Bu platformalar vasitəsilə tərəfdaş ölkələrlə birgə fəaliyyət göstərərək, regional problemlərin həllinə töhfə verir”, - deyə Altınbek Nuxulı əlavə edib.