Qazaxıstana rekord turist axını: Azərbaycandan çoxlu sayda səfər edənlər var
Astana, 18 sentyabr, AZƏRTAC
Qazaxıstanda 2024-cü ilin sentyabr ayının əvvəlində xarici turistlərin sayında böyükmiqyaslı artım qeydə alınıb.
AZƏRTAC-ın Qazaxıstan Respublikasının Turizm və İdman Nazirliyinə istinadən verdiyi məlumata görə, sentyabrın 1-dən 13-dək Qazaxıstana 597 min əcnəbi səfər edib.
Turist axınının artmasının əsas səbəbləri V Ümumdünya Köçəri Oyunlarının keçirilməsi və məşhur qazax ifaçısı Dimaş Kudaybergenin konserti olub.
Bu tədbirlər 89 ölkədən qonaqların diqqətini cəlb edib ki, bu da xarici ziyarətçilərin sayının əhəmiyyətli dərəcədə artmasına səbəb olub.
Turizm və idman nazirinin müavini Yerjan Yerkinbayevin sözlərinə görə, qonşu ölkələrlə yanaşı, qonaqlar Çin, Hindistan, Türkiyə, Almaniya və ABŞ-dan olub. "Çindən 33 mindən çox, Hindistandan 6 mindən çox, Almaniyadan 4 mindən çox, ABŞ-dan isə təqribən 2 min turist gəlib", - deyə o qeyd edib.
Yerkinbayev əlavə edib ki, Cənubi Koreya, Azərbaycan, Monqolustan və Böyük Britaniyadan da əhəmiyyətli sayda turist gəlib.
V Ümumdünya Köçəri Oyunları - beynəlxalq mədəni-idman tədbirdir. Təşkilat Komitəsinin məlumatına görə, Etnoaulu və oyunları 250 mindən çox insan ziyarət edib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
