Qazaxıstanda siyasi repressiya qurbanlarının 2,4 milyondan artıq arxiv kartı məxfilikdən azad edilib
Bakı, 18 sentyabr, AZƏRTAC
Qazaxıstan Baş Prokurorluğu 1929-cu ildən 1956-cı ilədək olan dövrdəki siyasi repressiya qurbanlarına aid 2,4 milyon arxiv kartının məxfilikdən azad edildiyini bildirib.
AZƏRTAC xəbər verir ki, bu məlumatı həmin qurumun mətbuat xidməti yayıb.
Məlumatda bildirilir ki, Qazaxıstanda siyasi repressiya qurbanlarının 2,4 milyondan artıq arxiv kartı məxfilikdən azad edilib. Xüsusi sürgün edilmiş 251 min nəfərin işi prezidentin arxivinə təhvil verilib və bundan sonra maraqlı şəxslər üçün əlçatan olacaq. İlin sonuna qədər əlavə 265 min iş arxivə təhvil veriləcək. Bundan əlavə, sürgün olunmuş, xüsusi olaraq sürgünə göndərilmiş və ya cinayət məsuliyyətinə cəlb edilmiş 311 min nəfərə bəraət verilib.
2020-ci il noyabrın 24-də Qazaxıstan Prezidenti Kasım-Jomart Tokayev Siyasi repressiya qurbanlarına tam bəraət verilməsi üzrə Dövlət komissiyasının yaradılması ilə bağlı fərman imzalayıb. Bu ilin yanvarında dövlət müşaviri Erlan Karin ölkə rəhbərinə siyasi repressiya qurbanlarının tarixçəsini əks etdirən 31 cildlik sənəd və materiallar toplusu təqdim edib. 1997-ci ildən respublikada hər ilin 31 may tarixi Siyasi Repressiya və Aclıq Qurbanlarının Anım Günü kimi qeyd olunur.
Bölmənin digər xəbərləri
