Qazaxıstandakı Turqay geoglifləri dünyanın ən qədim abidələrindən biri hesab oluna bilər
Astana, 11 may, AZƏRTAC
Qazaxıstanın Kustanay bölgəsindəki Turqay geoglifləri yaşına görə Naska xətlərini üstələyən dünyanın ən qədim analoji tikililərindən biri ola bilər.
AZƏRTAC “Kazinform”a istinadla xəbər verir ki, yeni arxeoloji tapıntılar bu yerlər ilə təxminən səkkiz min il əvvəl Neolit dövrü arasında mümkün əlaqəni göstərir.
Geogliflər 2007-ci ildə Kustanay tədqiqatçısı Dmitri Dey tərəfindən Turqay çökəkliyində “Google Earth” peyk şəkillərində aşkar edilib. 2023-cü ildən 2025-ci ilin dekabrına qədər Kustanay bölgəsinin Tarixi və Mədəni İrsin Tədqiqi, Bərpası və Qorunması Mərkəzi 11 ekspedisiya keçirib. Tədqiqatçılar səkkiz geoglifi araşdırıb, 11 yer və yaşayış məntəqəsi aşkar edib və 5 mindən çox artefakt toplayıblar. Keçən ilin əsas kəşfi Cangeldi rayonundakı Qızıloba Xətti geoglif kurqanında birbaşa Neolit keramika fraqmentlərinin aşkarlanması olub. Bu tapıntı Turqay geogliflərinin mümkün mənşəyinin əvvəllər düşünüləndən xeyli qədim olması lehinə ən inandırıcı arqumentlərdən biri hesab olunur.
Tədqiqatçılar geogliflərin yaşını qəti şəkildə müəyyən etmək üçün optik stimullaşdırılmış lüminesans metodu olan OSL analizinə əsaslanırlar. Nəticələr təxminən 8000 illik bir yaş göstərərsə, Turqay geoglifləri Perudakı Naska xətlərindən xeyli qədim olacaq.
Bölmənin digər xəbərləri
