Füzuli 4 noyabr, Aydın Yavərzadə, AZƏRTAC

Azərbaycan Ordusunun hərbçisi Ramin Quliyevin döyüş yolu 2016-cı ilin Aprel döyüşlərindən başlayıb. Gənc yaşlarından hərbi formanı qürurla geyinən Ramin torpaqlarımızın azadlığı uğrunda gedən döyüşlərdə iştirak edib. Aprel döyüşlərindən başlayan Zəfər Ramini bir əsgər kimi tək amal düşündürüb, Vətənin azadlığı uğrunda sonacan dayanmaq. Zamanla bu amal onun həyatının mənasına çevrilib. 2020-ci ildə başlayan 44 Günlük Zəfər yürüşündə və lokal xarakterli antiterror tədbirlərində də Ramin ön sıralarda yer alıb.

AZƏRTAC-ın bölgə müxbiri Vətən müharibəsi qazisi Ramin Quliyevlə həmsöhbət olub, onun döyüş yolu ilə bağlı xatirələrini qələmə alıb.

Quliyev Ramin Yurik oğlu 1986-cı ildə Füzuli rayonunun Əhmədbəyli kəndində anadan olub. Atası hərbçi olan Ramin azyaşlı vaxtlarından vətənpərvər ruhda böyüyüb və gələcəyin hərbçisi olmaq arzusu ilə yaşayıb. Ramin həqiqi hərbi xidmətə çağırış gəldiyi anı belə xatırlayır: "2005-ci il idi mənə çağırış gəldi. Xidmətə yollanırdım deyə sanki ən böyük arzum gerçəyə çevrilirdi. Həqiqi hərbi xidmətdə olarkən Vətən keşiyində dayanmağın necə şərəfli olduğunu anladım. Həqiqi hərbi xidmətimi bitirdikdən sonra bir müddət mülki işlərdə çalışsam da fikrim orduda xidmətdə qalmışdı. Daha sonra könüllü olaraq müraciət etdim və müddətdən artıq hərbi qulluqçu olaraq Vətən keşiyində dayandım. 2016-cı il Aprel döyüşləri zamanı da cəbhədə idim. Həmin Zəfər bizə daha böyük ruh yüksəkliyi verdi, Ali Baş Komandan İlham Əliyevin rəhbərliyi altında Azərbaycan ordusu öz qüdrətini, gücünü göstərdi və döyüşlər qələbəmizlə başa çatdı. Xidmətimi davam etdirsəm də səhhətimlə bağlı bir müddət sonra ordudan tərxis olundum. Amma yenə də fikrim xidmətə qayıtmaq idi. 2017-ci ildə mən tərxis olsam da qardaşım Elvin Aprel döyüşlərindən sonra müddətdən artıq qulluqçu olaraq Vətən keşiyində dayandı. Bu mənim üçün qürur hissi verirdi ki, mən olmasam da atamın yolunu qardaşım davam etdirir. Bir neçə il sonra səhhətim tam normallaşdıqda yenidən ordu sıralarında xidmətə başladım. 2020-ci il Vətən müharibəsində mən və qardaşım döyüşlərə qoşulduq".

Füzuli istiqamətində gedən ilk ağır döyüşlərdə Ramin və silahdaşları da ön cəbhədə olub. Taleh elə gətirib ki, Ramin və qardaşı Elvin Füzuli istiqamətində düşmən postlarının məhv edilməsində iştirak ediblər.

"2020-ci il sentyabrın 27-də ayrı-ayrı istiqamətlərdən döyüş əməliyyatlarına qatıldıq. Mən Füzuli rayonunun Abdurrəhmanlı istiqamətində, qardaşım isə Veysəlli istiqamətində döyüşürdü. Abdurrəhmanlı istiqamətində bütün postlar ələ keçirildi, 103, 104, 105 saylı ardıcıl postlar məhv edildi. 40 metrlik düşmən postu var idi, orada çox güclü mövqelənmişdilər və elə həmin postun alınması zamanı mühasirəyə düşdük. Bir neçə gün mühasirədə qalsaq belə təslim olmadıq, çünki qarşımızda bir amal var idi - torpaqları azad etmək. Belə də oldu. Digər bölmələrimizin dəstəyi ilə mühasirədən çıxaraq düşməni məhv etdik. Sonrakı döyüş tapşırıqlarımız Füzulinin digər kəndləri istiqamətində oldu. Sonradan isə Xocavənd istiqamətində döyüş tapşırığı aldıq. Taktiki gedişə uyğun olaraq, düşmən arxasına keçməklə kəşfiyyat məlumatları toplayıb və həmin məlumatlar əsasında hakim yüksəklikləri azad edərək ərazilərə nəzarəti daha da gücləndirdik. Tağlar və Tuğ kəndlərinin yuxarı hissəsində gərgin döyüşlərimiz oldu və həmin əraziləri də azad etdikdən sonra növbəti tapşırıq artıq Şuşanın azad edilməsi idi. Bir neçə istiqamətdən Şuşaya hücum planı hazırlanmışdı. Verilən tapşırığa uyğun olaraq Topxana meşəsi tərəfindən düşmən mövqelərini məhv etmək üçün döyüşlərə qoşulduq. Torpaqlarımızın hər qarışı azad ediləndə qələbənin dəyəri səngərdə hiss olunurdu. Yağış, soyuq, mərmi yağışı heç nə müzəffər ordumuzun iradəsini sındıra bilmədi. Ali Baş Komandan İlham Əliyevin rəhbərliyi altında Azərbaycan Ordusu mütləq qələbə ilə Şuşanı da azad etdi".

Qələbədən sonra da Ramin və qardaşı Elvin xidmətlərini davam etdirib. Onlar komando birliyində xidmət etmək üçün kurslara qoşulub və uğurla keçərək komando mənsubu kimi Vətən keşiyində dayanıblar.

"Qalib ordu sıralarında xidmət etmək hər birimizə qürur və şərəf hissi verdi. Düşmən tərəfi məğlub olsa da hiyləgər əməllərindən geri qalmırdılar. 2023-cü il sentyabrın 19-da düşmən tərəfi növbəti dəfə təxribat törədəndə ordumuza lokal xarakterli antiterror əməliyyat tapşırığı gəldi. Həmin döyüşlərdə qardaşımla eyni tapşırığa qoşulduq. Bizim tapşırıq Xocavənd rayonunun Yemişcan kəndi ərazində yüksəkliyi azad etmək idi. Həmin istiqamətdə aparılan əməliyyatlar zamanı 40 dəqiqə ərzində biz yüksəkliyi azad etdik və qarşı tərəfin xüsusi təyinatlıları ilə yaxın məsafədə döyüşlərimiz oldu. Hətta əlbəyaxa da döyüşdük və qələbə qazandıq. Yüksəkliyi itirən düşmən tərəfi artilleriya atəşləri ilə müqavimət göstərməyə başladı. Buna baxmayaraq tapşırıq uğurla icra olundu. Məğlubiyyəti həzm edə bilməyən düşmən ağır artilleriyadan davamlı hücumlar edirdi. Həmin döyüş zamanı qardaşım Elvin şəhid oldu, mən isə ağır qəlpə yaraları aldım. Amma döyüşlər mütləq qələbəmizlə başa çatdı. Qardaşım Elvin və digər silahdaş qardaşlarımın şəhid olduğu an mənim üçün həm ağrılı, həm də qürurlu idi. Mən və digər döyüşçü yoldaşlarım yaralansaq da döyüş meydanını tərk etmədik, qardaşlarımızla başlatdığımız mübarizəni sona qədər davam etdirdik. Həmin gün digər ərazilər kimi Yemişcan yüksəkliyinin də azad edilməsi Azərbaycan əsgərinin iradəsini, birliyini və qəhrəmanlığını göstərdi. Bir daha anladım ki, ordumuzun döyüş yolu, şəhid qardaşlarımın fədakarlığı, Vətənə sədaqəti Azərbaycan gəncliyi üçün örnəkdir. Bu gün torpaqlarımız azaddır, şəhidlərimizin ruhu şaddır, artıq azad olunan ərazilərdə həyat yenidən canlanıb, sakinlər doğma yurduna qovuşub və inanıram ki, bizim qələbəmiz əbədi və sarsılmazdır".

Qeyd edək ki, Qazi Quliyev Ramin Yurik oğlu döyüşlərdə göstərdiyi şücaətə görə, "Füzulinin azad olunmasına görə", "Xocavəndin azad olunmasına görə", "Döyüşdə fərqlənməyə görə" və "Vətən müharibəsi iştirakçısı" medalları ilə təltif edilib.

Ramin Quliyevin qardaşı Nadirli Elvin Yurik oğlu isə 44 günlük Vətən müharibəsində şücaətə görə “Vətən müharibəsi iştirakçısı”, “Cəsur döyüşçü”, “Füzulinin azad olunmasına görə”, “Xocavəndin azad olunmasına görə”, “Şuşanın azad olunmasına görə” medalları ilə, lokal xarakterli antiterror tədbirlərində göstərdiyi şücaətə görə isə ölümündən sonra 3-cü dərəcəli "Vətənə xidmətə görə” ordeni və "Vətən uğrunda" medalı ilə təltif edilib.