QƏBƏLƏ RAYON AĞSAQQALLAR ŞURASININ SƏDRİ NAZİM MUSTAFAYEVİN ÇIXIŞI
- Möhtərəm cənab Prezident! Qəbələyə xoş gəlmisiniz!
Hörmətli görüş iştirakçıları!
Mən Qəbələ rayonunun ağsaqqalları, bütün ictimaiyyəti, gəncləri
adından cənab Prezidentimiz İlham Əliyevə “Xoş gəlmisiniz!” deyirəm və onu bağrıma basıram, öpürəm.
Gündən-günə çiçəklənən doğma Azərbaycanımızın bütün rayonlarında olduğu kimi, bu gün Qəbələ rayonunda, qədim Qəbələ şəhərində də ən istəkli adamımızı qəbul edirik. Ona görə bütün camaatımız adından, Qəbələ əhalisi adından ona bir daha “Xoş gəlmiziniz!” deyirəm və onu bağrıma basıram.
Əziz Prezidentimiz, ilk növbədə onu demək istəyirəm ki, gündən-günə çiçəklənən doğma Azərbaycanımızın dilbər guşəsi Qəbələ gözəl inkişafdadır.
Cənab Prezident, ulu öndərimiz, əbədiyaşar Prezidentimiz hələ bir neçə il bundan öncə bu meydanda bizimlə mehribancasına söhbət etmişdir. Biz bu gün onun abidəsi önünə toplaşmışıq. Qəbələnin bu gözəl meydanı bütün qəbələlilər, gələn qonaqlar üçün ulu öndərimizi ziyarət yeri olacaqdır.
Cənab Prezident!
Bu gün Azərbaycanın hər yerində olduğu kimi, Qəbələdə də inkişaf vardır. Ulu Peyğəmbərimiz buyurmuşdur ki, səhər işə gedib axşamlar evinə dönən insanlar xoşbəxtdir. Bu xoşbəxtliyi Siz xalqımıza vermisiniz. 600 min iş yerinin açılması o deməkdir ki, işləyərək özünü və ailəsini saxlayacaqdır. Yaxşı yadımdadır, on iki-on üç il öncə biz çörək növbəsinə durub aldığımız çörəyi sıxanda su çıxırdı. Bu gün isə bu gözəl yaşayışı bizə Siz vermisiniz və buna görə Sizə minnətdarıq.
Qəbələdə, o cümlədən Azərbaycanımızın hər yerində inkişaf var, quruculuq işləri gedir. Ətrafa baxdıqca, biz ağsaqqalların qəlbi açılır. Azərbaycan xalqı Sizi çox sevir, ancaq qəbələlilər daha çox sevirlər. Ona görə ki, Sizin buraya hər gəlişinizdən sonra Qəbələdə inkişaf daha da sürətlənir. Hər tərəfdə quruculuq, abadlıq işləri gedir, daha gözəl binalar tikilir. Bu gün Qəbələdə çınqıl zavodu, konserv zavodu, asfalt zavodu, beton zavodu fəaliyyət göstərir. Bunların hamısı Sizin sayənizdə, Sizin göstərişinizlə başa gəlibdir. Bu, xalqın istəyidir. Xalq Sizi dəstəkləyir, Sizə həmişə arxa-dayaq olacağını bildirir.
Cənab Prezident!
Məlum edirəm ki, bu gün biz qəbələlilər Sizinləyik. Azərbaycan xalqı Sizə ilk seçkidə 70 faiz səs vermişdisə, bu gün təkcə qəbələlilər deyil, Azərbaycan xalqı Sizə 99 faiz səs verməyə hazırdır.
Azərbaycanımızın bu gözəl guşəsində həmişə bizim yanımızda olmusunuz və daim xeyir-duanızı eşitmişik. Qəbələ camaatı, Qəbələ ağsaqqalları bütün illər boyu Sizi hakimiyyət başında, yəni Prezident kimi görmək istəyir. Sizi çox uzun illər, yəni on illər, daha çox Prezident görməyi arzulayırıq.
Bu gün Qəbələdə gedən quruculuq işlərinə nəzər saldıqda görürük ki, bu, hər birimizin qəlbində fərəh hissi doğurur. Xalqımız Sizə minnətdardır. Bu gözəlliyi, bu yaraşığı, bu əmin-amanlığı Siz bizə bəxş etmisiniz.
Cənab Prezident, mən Sizi bir daha salamlayıram, bağrıma basıram. Yenə deyirəm, qəbələlilər Sizinlədir, Sizə arxadır və Sizi dəstəkləyirlər.
Cənab Prezident, mən bütün qəbələlilər adından, o cümlədən gənclər, ağsaqqallar adından Sizə uzun ömür, cansağlığı arzulayıram. Ulu Tanrı həmişə dayağınız olsun! Sağ olun.
X X X
Azərbaycan Prezidenti İlham Əliyev görüşdə nitq söylədi. (Dövlətimizin başçısının nitqi qəzetin bugünkü nömrəsinin birinci səhifəsində dərc dərc olunur).
Prezident İlham Əliyev rayon sakinləri ilə bir daha səmimiyyətlə görüşdü, onların problemləri, qayğıları ilə maraqlandı. Qəbələlilər dövlətmizin başçısının daxili və xarici siyasətini dəstəklədiklərini bildirdilər, xalqımızın güzəranının yaxşılaşdırılması, bölgələrin inkişafı üçün gördüyü işlərə görə minnətdarlıq etdilər.
Bölmənin digər xəbərləri
