Qəbələdə indiyədək 650 hektarda təkrar qarğıdalı əkilib
Qəbələ, 20 iyul, Mustafa Dadaşov, AZƏRTAC
Taxıl biçini başa çatdıqdan sonra Qəbələ rayonunun təsərrüfatlarında 700 hektaradək sahədə təkrar qarğıdalı əkininin aparılması nəzərdə tutulur. Bu istiqamətdə işlər artıq yekunlaşmaq üzrədir. İndiyədək rayon ərazisində 650 hektar sahədə dən və silos üçün təkrar qarğıdalı əkilib.
Bu barədə AZƏRTAC-ın bölgə müxbirinə Qəbələ Dövlət Aqrar İnkişaf Mərkəzinin bitkiçilik sektorunun müdiri Elimdar Şərifov məlumat verib.
Qurum rəsmisinin sözlərinə görə, rayon üzrə təkrar əkinlər ən çox Vəndam qəsəbəsinin, həmçinin Yenikənd, Tüntül, Hacıalılı kəndlərinin ərazilərində aparılıb.
Qeyd edək ki, təkrar əkinlər həm aqroekoloji, həm də iqtisadi baxımdan səmərəlidir. Mütəxəssislər hesab edir ki, respublikada mal-qaranın qüvvəli və yaşıl yemə olan tələbatını tam təmin etmək üçün təkrar əkinlərdən istifadə vacib sayılır. Ölkəmizdə taxıl biçinindən sonra aran və dağətəyi bölgələrdə yerləşən 100 min hektaradək ərazidə təkrar əkinlər aparıla bilər. Ölkə üzrə təkrar əkin sahələrinin hər hektarından 350-400 sentner yaşıl kütlə və ya 40-50 sentner dən məhsulu əldə etmək mümkündür.
Bu il təkrar qarğıdalı əkininə görə fermerlərə toxum almaq üçün dövlət tərəfindən hər hektara 60 manat birdəfəlik vəsait ödəniləcək.
Bölmənin digər xəbərləri
