QƏBƏLƏDƏ MAL-QARANIN CİNS TƏRKİBİ YAXŞILAŞDIRILIR
Qəbələ, 22 fevral (AZƏRTAC). Son illər Qəbələ rayonunda meyvəçilik və əkinçiliklə yanaşı, heyvandarlıq sahəsində də əhəmiyyətli dirçəliş hiss olunur. Rayon icra hakimiyyətinin aqrar şöbəsindən bildirmişlər ki, hazırda kəndli fermerlər və fərdi təsərrüfat sahibləri tərəfindən ümumilikdə 52 min 26 baş mal-qara, 217 min 194 baş qoyun və keçi, 316 min 41 baş toyuq bəslənilir.
Fərdi təsərrüfatlarda qaramalın baş sayının artmasına baxmayaraq, heyvandarlıq komplekslərinin yaradılmasına da ciddi ehtiyac duyulur. Rayonda bu sahədə də müəyyən işlər görülür. İndiyədək üç özəl damazlıq təsərrüfatı yaradılmışdır. Bu təsərrüfatlar mal-qaranın cins tərkibinin yaxşılaşdırılmasında mühüm rol oynayırlar.
Qəbələnin kəndlərində damazlıq işinin keyfiyyətinin yaxşılaşdırılması məqsədilə açılmış süni mayalanma məntəqələrinin sayı 6-ya çatdırılmışdır. Yaxın vaxtlarda daha 3 kənddə belə məntəqələrin yaradılması nəzərdə tutulur. Kənd Təsərrüfatı Nazirliyi tərəfindən lazımi avadanlıqla təmin edilmiş bu məntəqələrdə təkcə 2009-cu ildə 1.653 baş inək və düyə süni mayalandırılmışdır.
Heyvanların və quşların yoluxucu xəstəliklərə qarşı müqavimətini artırmaq məqsədilə vaxtaşırı profilaktiki işlər görülür.
Həyata keçirilən tədbirlər sayəsində rayonda heyvandarlıq məhsulları istehsalı ildən-ilə artır. Ötən il 5.327 ton ət, 25 min 658 ton süd, 438 ton yun, 7.985 min ədəd yumurta istehsal olunmuşdur.
Bölmənin digər xəbərləri
