SİYASƏT

Qənirə Paşayeva: Ermənistanın hərbi təxribatı beynəlxalq təşkilatlar tərəfindən birmənalı şəkildə pislənildi

22.07.2020 [18:33]
Çap et
A⁺ A^-

Bakı, 22 iyul, AZƏRTAC

Ermənistan silahlı birləşmələrinin iyulun 12-dən başlayaraq Tovuz istiqamətində törətdiyi hərbi təxribatla bölgədə gərginliyin alovlanması, bunun nəticəsində hər iki tərəfdən itkilərin olması yerli və beynəlxalq ictimaiyyətin haqlı narahatlığına səbəb olub. Ermənistanın bu təcavüz aktına dünyanın müxtəlif dövlətləri və beynəlxalq təşkilatlar tərəfindən münasibət bildirilib.

Azərbaycanın qurucu üzvü olduğu Türk Şurası, TÜRKPA, GUAM və fəal üzvü olduğumuz İslam Əməkdaşlıq Təşkilatı, Qoşulmama Hərəkatı kimi beynəlxalq təşkilatlar tərəfindən Ermənistan hərbi təxribatını, növbəti hücum və işğal cəhdini qətiyyətlə qınayan bəyanatlar verilib, kommünike qəbul edilib.

Bu fikirləri AZƏRTAC-a Milli Məclisin Mədəniyyət komitəsinin sədri Qənirə Paşayeva bildirib.

Komitə sədri diqqətə çatdırıb ki, Türk Şurasının Baş katibi Bağdad Amreyev iyulun 14-də verdiyi açıqlamada Ermənistanın artilleriya qurğularından istifadə etməklə Azərbaycanın mülki əhalisinin sıx yaşadığı əraziləri atəşə tutmasını qətiyyətlə pisləyib və Ermənistanın bu təxribatı nəticəsində dünyasını dəyişən şəhidlərin ailələrinə başsağlığı verib. Baş katib Türk Şurasının Ermənistan-Azərbaycan Dağlıq Qarabağ münaqişəsinin beynəlxalq hüququn norma və prinsipləri əsasında, Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığı əsasında həlli ilə bağlı mövqeyini bir daha təsdiq edib.

Yenə həmin tarixdə İslam Əməkdaşlıq Təşkilatının (İƏT) Baş katibi Yusif bin Əhməd əl-Osaymin bəyanatla çıxış edərək Ermənistanın Azərbaycan Respublikasının Tovuz rayonuna hücum cəhdini qətiyyətlə pisləyib. Bəyanatda Ermənistan silahlı qüvvələrinin Azərbaycanın işğal olunmuş ərazilərindən tam və qeyd-şərtsiz çıxmasını tələb edən İƏT-in məlum qərar və qətnamələrinə, eləcə də, BMT Təhlükəsizlik Şurasının qətnamələrinə istinad edilərək, münaqişənin Azərbaycan Respublikasının suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığı əsasında həllinin dəstəkləndiyi vurğulanıb.

Deputat diqqətə çatdırıb ki, Qoşulmama Hərəkatının 18 iyul 2020-ci il tarixli kommünikesi isə Ermənistanın iki dövlətin beynəlxalq sərhədində son hərbi təxribatı, yeni işğal cəhdi ilə bağlı 120 üzv dövlətin mövqeyini ifadə edib. Hərəkat üzvləri Azərbaycan Respublikasının müstəqilliyi, suverenliyi və ərazi bütövlüyünə birmənalı dəstəyini bildirərək, Azərbaycanın öz ərazi bütövlüyünü bərpa etmək məqsədilə göstərdiyi səylərlə həmrəy olduğunu ifadə ediblər. TÜRKPA-nın Baş katibi Altınbek Mamayusupov Ermənistanın hərbi təxribatını şiddətlə qınayıb. GUAM isə sosial şəbəkə hesablarından etdiyi paylaşımlarda Ermənistan silahlı qüvvələrinin Azərbaycan və Ermənistan sərhədinin Tovuz rayonu istiqamətində hücumunu pisləyib və Azərbaycan Xarici İşlər Nazirliyinin bəyanatını paylaşıb. Göründüyü kimi, baş vermiş təxribatla bağlı BMT, Aİ, ATƏT-in fəaliyyətdə olan sədri, eləcə də ATƏT-in Minsk qrupunun həmsədrlərinin verdiyi neytral və ümumi sakitləşməyə çağıran açıqlamalarla yanaşı, dünya ölkələrinin əksəriyyətini öz sıralarında birləşdirən Qoşulmama Hərəkatı, eləcə də İƏT və Türk Şurası kimi beynəlxalq təşkilatlar tərəfindən işğalçı ölkəyə münasibətdə birmənalı və qətiyyətli ismarışlar ünvanlanıb.

“Ermənistanın daha çox güvəndiyi KTMT-dən arzuladığı dəstəyi, müsbət cavabı ala bilmədi və əksinə, öz daxili böhranına daha bir çalar qazandırmış oldu. Ermənistanın başqa bir avantürası isə ABŞ Konqresində iflas etdi. Azərbaycan əleyhinə düzəliş keçmədi, əvəzində ilk dəfə Ermənistan əleyhinə düzəlişlər qəbul edildi. ABŞ-ın erməni qrupları ötən il olduğu kimi, bu il də, Konqresin bəzi ermənipərəst üzvlərinin dəstəyi ilə, 2021-ci maliyyə ili üzrə “Milli Müdafiə Maliyyələşmə Qanunu” layihəsinə Azərbaycanın mənafeyi əleyhinə düzəlişlər daxil edilməsinə səy göstərirdi. Bu proses çərçivəsində, Azərbaycana dəstək verən bir sıra Konqres üzvləri isə Ermənistanın əleyhinə iki düzəliş irəli sürmüşdü. Amma erməni lobbisinin səylərinə baxmayaraq, Kaliforniya ştatını təmsil edən, qatı ermənipərəstliyi ilə tanınan Konqres üzvü Bred Şerman tərəfindən Azərbaycan əleyhinə irəli sürdüyü “Mülki aviasiyaya təhdid olmadığı barədə Prezident tərəfindən Konqresə təminat verilənə qədər ABŞ tərəfindən Azərbaycana müdafiə məhsulları və xidmətlərinin qadağan olunması”na dair 66 saylı düzəliş, habelə Kaliforniyanı təmsil edən erməni əsilli Cəki Spiir tərəfindən “333-cü bölmə çərçivəsində xarici təhlükəsizlik qüvvələrinin imkanlarının artırılması proqramı üzrə Azərbaycan və Ermənistan arasında yardımlar üzrə paritet tətbiq edilməsi” barədə 330 saylı düzəlişi qəbul edilməyib. Təbii ki, bu uğursuzluqlar erməni lobbisinin, xüsusi ilə də, “Daşnak” partiyasını təmsil edən ANCA-nı (“Amerika Erməni Milli Komitəsi”) çaşqınlıq və məyusluğa düçar edib”, - deyə Qənirə Paşayeva diqqətə çatdırıb.

Deputatın sözlərinə görə, Konqres üzvü Stiv Kohen tərəfindən “Rusiyanın hərbi qüvvələrinin yerləşdiyi ölkələrdə sözügedən qüvvələr barədə geniş bilginin ehtiva olunduğu hesabatın Konqresə təqdim olunması” barədə 99 saylı düzəliş, habelə Konqres üzvləri Stiv Şabot və Stiv Kohen tərəfindən birgə “Azərbaycan, Gürcüstan, Ukrayna və Moldovada işğal olunmuş ərazilərdən köçkün düşmüş və həmin ərazilərdə qətlə yetirilmiş sözügedən ölkələrin vətəndaşları barədə hesabatın Dövlət katibi tərəfindən Müdafiə katibi ilə əlaqələndirilməklə Konqresə təqdim olunması” barədə 296 saylı düzəliş Konqresin Nümayəndələr Palatası tərəfindən qəbul olunub.

Göründüyü kimi, 99 saylı düzəlişdə məqsəd Ermənistana Konqresdə əlavə təzyiqlərin yaradılmasıdır. 296 saylı düzəlişə gəldikdə isə Konqresin Nümayəndələr Palatası Azərbaycan, Gürcüstan, Moldova və Ukrayna ərazilərinin işğal faktını vurğulamaqla yanaşı, işğal olunmuş ərazilərdən köçkün düşmüş və həlak olmuş əhali barədə məlumatların ABŞ Dövlət və Müdafiə Departamentlərinin birgə hesabatı şəklində Konqresə təqdim olunmasını nəzərdə tutur.

Qənirə Paşayeva deyib: “Bütün bunlar, bir daha göstərir ki, Azərbaycan Prezidentinin uğurlu xarici siyasət kursu, haqlı mövqeyimiz, uzun illər ərzində qazandığımız etimad artıq öz bəhrəsini tam şəkildə verməkdədir. Fürsətdən istifadə edib, dünyanın dörd yanında öz haqq səslərini ucaldan, müxtəlif aksiyalar təşkil edən soydaşlarımıza, haqq-ədalətin təntənəsinə çalışan bütün tərəqqipərvər insanlara səmimi minnətdarlığımı bildirirəm”.