Qərbi Azərbaycan İcmasının fəaliyyətinin formalaşması üçün konsepsiyaya xüsusi müddəalar daxil edilib
Bakı, 26 yanvar, AZƏRTAC
Qərbi Azərbaycan İcması bilir ki, qayıdış çox çətin və ağır olacaq. Ona görə də fəaliyyətinin uzunmüddətli və daimi formalaşması üçün Qərbi Azərbaycana Qayıdış Konsepsiyasına xüsusi müddəalar daxil edilib.
AZƏRTAC xəbər verir ki, bu sözləri jurnalistlərə açıqlamasında Qərbi Azərbaycan İcması sədrinin müavini, Milli Məclisin deputatı Hikmət Babaoğlu söyləyib.
"Eyni zamanda, biz bilirik ki, təhlükəsizlik məsələsi çox vacibdir. 1988-1991-ci illərdə Qərbi Azərbaycandan qovulan vətəndaşların Ermənistan hökumətinə və dövlətinə inamı olmadığından qayıdış üçün beynəlxalq zəmanətin olması və real məcburi hüquqi prosedurun tətbiq olunması məsələsi aktualdır ki, bu da konsepsiyada öz əksini tapıb. Bu şərtlər olmadan Qərbi Azərbaycana qayıdış, orada ləyaqətli və təhlükəsiz yaşamaq mümkün deyil. Ona görə də icma cəhd edəcək və çalışacaq ki, Ermənistanla Azərbaycan arasında imzalanması nəzərdə tutulan mümkün sülh müqaviləsinə Qərbi azərbaycanlıların hüquqlarının tanınması məsələsi əlavə edilsin", - deyə H.Babaoğlu qeyd edib.
O bildirib ki, Qərbi Azərbaycan icmasının əsas vəzifələrindən biri də tarixi torpaqlarımıza qayıtdıqdan sonra müxtəlif əyani vəsaitlər əsasında bizə aid olan abidələrimizin dirçəldilməsi və bərpa olunması ilə bağlı fəaliyyətdir. Həmçinin əsas hədəflərdən biri beynəlxalq arenada Qərbi Azərbaycan icmasının səsinin eşidilməsinə nail olmaqdır. Bu istiqamətdə beynəlxalq və regional insan hüquqları təşkilatları ilə sıx əməkdaşlıq etməklə onların məhz Qərbi Azərbaycan İcmasının bu münasibətlərdə hüquqi subyekt kimi tanınmasına nail olmaq lazımdır.
Bölmənin digər xəbərləri
