Bakı, 16 oktyabr, AZƏRTAC

Qərbi Kaspi Universiteti fəaliyyətini hər zaman dünyanın qabaqcıl təhsil təcrübəsinə uyğun qurmağa çalışır. Müasir çağırışlar qarşısında ən qabaqcıl standartlara uyğunlaşaraq inkişaf etmək bu universitetin əsas prioritetlərindən biridir.

AZƏRTAC xəbər verir ki, Qərbi Kaspi Universitetinin əsas məqsədi ölkə daxilində və xaricdə rəqabətqabiliyyətli, əmək bazarında təhsili, biliyi, bacarığı, problemləri görmək və həll etmək qabiliyyəti hesabına özünü işlə təmin edəcək, hətta iş yerləri yaratmaq imkanına sahib ola biləcək peşəkarlar hazırlamaqdır. Dürüst, ədalətli, ölkəsini və xalqını özünün yüksək alicənablıq keyfiyyətləri, sağlam düşüncəsi ilə təmsil edə bilən, həyatda hansı sahədə fəaliyyət göstərməsindən asılı olmayaraq, cəmiyyətdə hörmət və sevgi qazanan məzunları yetişdirmək universitetin məqsədidir.

Artıq 31 ildir ki, universitet fəaliyyətini yüksək səviyyədə davam etdirir.

Azərbaycanın ilk özəl ali təhsil müəssisəsi olan Qərb Universitetinin (indiki Qərbi Kaspi Universiteti) əsası 1991-ci ildə qoyulub. Qərb Universiteti 1992-ci ildən UNESCO nəzdindəki Beynəlxalq Universitetlər Assosiasiyasının, 1996-cı ildən İdarəçiliyin İnkişafı üzrə Avropa Fondunun, 1999-cu ildən Qara Dəniz Ölkələri Universitetlər şəbəkəsinin, eyni zamanda, Qafqaz üzrə Avropa Araşdırmaları Assosiasiyasının (AESC), Siyasi Araşdırmalar Assosiasiyasının (PSA), Avropa Elm Fəlsəfəsi Assosiasiyasının (EPSA), BMT-nin Dayanıqlı İnkişaf Həlləri Şəbəkəsinin (SDSN), Beynəlxalq Universitetlər Assosiasiyasının, Beynəlxalq Dırmanma və Alpinizm Federasiyasının (UIAA), BMT-nin Dağ əməkdaşlığı Proqramının Beynəlxalq Təhsil İdarəçiləri Assosiasiyasının və bir sıra başqa beynəlxalq təşkilat, şura və birliklərin üzvüdür.

2017-ci ildən bu ali təhsil müəssisəsinin adı dəyişdirilərək Qərbi Kaspi Universiteti olub. 2001-ci ildən Beynəlxalq İnzibati Elmlər İnstitutunun və “Atlas” Beynəlxalq Turizm Assosiasiyasının üzvü olan bu universitetin tələbələrinin Avropa, ABŞ və dünyanın başqa ölkələrinin universitetlərində, eləcə də kollec və özəl məktəblərdə təhsil almaq imkanları var.

Azərbaycan iki müxtəlif və bir-birinə əks olan Şərq və Qərb mədəniyyətlərinin qovşağında yerləşən ölkədir. Bu da Qərbi Kaspi Universitetinin hər bir tələbəsinə Qərb standartlarına uyğun təhsil almaqla yanaşı, Şərq və Qərb mədəniyyətlərinin qovuşduğu maraqlı mühitdən zövq almaq imkanı verir.

Fəaliyyət göstərdiyi illər ərzində ölkənin aparıcı ali təhsil ocaqlarından birinə çevrilən Qərbi Kaspi Universiteti 63 ixtisas üzrə 5000-dək tələbəyə əyani və qiyabi təhsil proqramlarına əsaslanan təhsil verir. Universitetdə 7 fakültə (məktəb), 18 kafedra, 11 şöbə fəaliyyət göstərir. Universitetdə çalışan 275 müəllimdən 72-si elmlər doktoru, professor, 42 nəfəri isə dosentdir. Bir sıra beynəlxalq təhlillərdə Qərbi Kaspi Universiteti SSRİ-nin süqutundan sonra yeni mühitdə yaranmış ən yaxşı 10 universitetdən biri kimi göstərilib. Əsas və günün tələbi olan fənlər yerli və xarici müəllimlər tərəfindən tədris olunur.

Qərbi Kaspi Universiteti öz strukturunun modern universitet strukturuna uyğunlaşması istiqamətində tədbirlər görür. Universitetin infrastrukturunun, maddi-texniki bazasının möhkəmləndirilməsi istiqamətində ardıcıl tədbirlər həyata keçirilir. Bu ali təhsil müəssisəsində müxtəlif sahələrlə bağlı müasir, unikal laboratoriyalar yaradılıb, tədris metodikasının yenilənməsi, ən yüksək beynəlxalq standartlara uyğunlaşdırılması üçün ardıcıl iş aparılıb. Universitetdə tələbələrin asudə vaxtlarını səmərəli keçirməsi üçün idman zalı, texnopark və klublar mövcuddur.

Xaricdə təhsil layihəsi qısa və uzunmüddətli dövrdə xaricdə təhsil proqramlarında iştirak etmək imkanı yaradır. Hazırda Erasmus + və Mövlanə mübadilə layihələri çərçivəsində universitetin tələbələri Çexiya, Polşa, Latviya, Rumıniya, Türkiyə, İrlandiya kimi ölkələrin aparıcı universitetlərində təhsil ala bilərlər. Qərbi Kaspi Universiteti Böyük Britaniyanın “Koventri və bu ölkənin Sinqapurda yerləşən London Biznes və Maliyyə Məktəbi, İsveçrənin UBİS və Çexiyanın NEWTON universitetləri ilə ikili diplom layihələrini həyata keçirir. Universitet dünyanın hər bir yerindən tələbələr qəbul edir.

Qərbi Kaspi Universiteti beynəlxalq elmi ictimaiyyətdə öz mövqeyini möhkəmləndirərək, “Scopus” elmmetrik bazasında müxtəlif elm sahələri üzrə indekslənmiş elmi nəşrləri ilə seçilir. Universitetdə aparılan tədqiqatlar geniş sahələri - sosial, iqtisadi, texniki, təbiət və humanitar elmləri - əhatə edir. Bu multidisiplinar yanaşma həm fundamental, həm də tətbiqi elmlərin inkişafına xidmət edir və elmi nəticələrin beynəlxalq miqyasda tanınmasına şərait yaradır.

Universitetin “Scopus” bazasında indekslənməsi Qərbi Kaspi Universitetinin elmi fəaliyyətinin keyfiyyət göstəricisi olmaqla yanaşı, onun qlobal elmi məkana inteqrasiyasını da təsdiqləyir. Tədqiqatçıların beynəlxalq jurnallarda dərc olunan məqalələri universitetin elmi nüfuzunun yüksəldilməsinə, beynəlxalq tərəfdaşlığın genişlənməsinə və innovativ elmi istiqamətlərin təşviqinə mühüm töhfə verir.

Qərbi Kaspi Universitetində həyata keçirilmiş elmi layihələr müxtəlif istiqamətləri - təbiət elmləri, mühəndislik, informasiya texnologiyaları, sosial-iqtisadi sahələr və humanitar elmləri əhatə edir. Bu layihələr çərçivəsində aparılan tədqiqatlar beynəlxalq elmi bazalarda indekslənmiş nəşrlərdə əksini tapıb, həmçinin bir sıra praktiki nəticələr verib. Universitetin elmi layihələri ölkə və regionun elmi-texnoloji inkişafına, eləcə də innovasiya potensialının artırılmasına əhəmiyyətli töhfə verib.

Son illərdə Qərbi Kaspi Universitetində elmi fəaliyyətin intensivləşməsi nəticəsində beynəlxalq elmi bazalarda dərc olunan məqalələrin sayı 3035-ə çatıb.

Qərbi Kaspi Universiteti sosial-iqtisadi, tətbiqi, gender və təbiət elmləri sahələrində Azərbaycan və beynəlxalq akademik ictimaiyyət arasında elmi kommunikasiya üçün aparıcı platformalardan biridir. Universitet müasir elmi tədqiqatları təşviq edir, multidisiplinar (çoxsahəli) araşdırmaları genişləndirir və gənc tədqiqatçıların inkişafı üçün davamlı platforma yaradır. Ali təhsil müəssisəsi qlobal elmi şəbəkələrdə fəal iştirak etməklə fundamental və tətbiqi elmlərdə yeni üfüqlər açır.

Xarici universitetlərin aparıcı tədqiqatçıları və Qərbi Kaspi Universitetinin alimləri tərəfindən idarə olunan beynəlxalq tədqiqat mərkəzləri ilə fəaliyyət göstərir.

Qərbi Kaspi Universitetinin Dağ Biomüxtəlifliyi, Landşaft və Mədəniyyət Tədqiqatları İnstitutunun alimləri BMT-nin Beynəlxalq Dırmanma və Alpinizm Federasiyası ilə birlikdə buzlaqların həm azalma, həm də ərimə proseslərini tədqiq edirlər.

Universitetdə tədqiqat laboratoriyaları fəaliyyət göstərir - Genetika və Molekulyar Biologiya laboratoriyası, Ekoloji və biomüxtəliflik tədqiqatlar laboratoriyası, Meşə artımının təhlili və Dendroxronologiya laboratoriyası, Hidrobiologiya laboratoriyası, Kimya və ətraf mühitin monitorinqi laboratoriyası, Mexanika və robototexnika mühəndisliyi laboratoriyası, Smart materialların istehsalı laboratoriyası, Fizika və Elektronika laboratoriyası və Dizayn emalatxanası.

Qərbi Kaspi Universitetinin ev sahibliyi etdiyi beynəlxalq konfransın materialları “Scopus” kimi nüfuzlu beynəlxalq elmi bazada indeksləşdirilib. Bu, təkcə universitetin deyil, eyni zamanda Azərbaycanın akademik mühitinin qlobal elm sahəsinə inteqrasiyası və tanınması istiqamətində əhəmiyyətli bir addımdır.