QİƏT REGİONAL İNTEQRASİYANIN UĞURLU NÜMUNƏSİDİR

01.11.2006 [20:04]
Çap et
A⁺ A^-

AZƏRTAC-ın xüsusi müxbiri xəbər verir ki, Qara dəniz İqtisadi Əməkdaşlıq Təşkilatında (QİƏT) Rusiyanın sədrliyi dövründə 60-dan çox tədbir keçirilmiş, üzv ölkələrin fövqəladə hallar, nəqliyyat, energetika, rabitə, informasiya texnologiyaları nazirlərinin görüşü, habelə bir çox işçi qrupların iclasları təşkil olunmuşdur. Bunu Rusiyanın xarici işlər naziri Sergey Lavrov QİƏT ölkələri xarici işlər nazirlərinin 15-ci iclasının açılışında Rusiyanın bu təşkilatda sədrliyinə yekun vurarkən bildirmişdir. O demişdir ki, QİƏT-i, haqlı olaraq, regional inteqrasiyanın uğurlu nümunələrindən biri saymaq olar, təşkilat özünü doğrultmuşdur və regional işlərdə getdikcə daha inamla iştirak edir.

S.Lavrov vurğulamışdır ki, Rusiya tərəfinin təşəbbüsü ilə Qara dəniz ətrafında sürətli avtomobil magistrallarının inkişafı layihəsinin gerçəkləşdirilməsi ilə bağlı qarşılıqlı anlaşma haqqında memorandum hazırlanmışdır. QİƏT-in himayəsi ilə Qara dəniz limanları arasında sərnişin daşımalarının bərpa edilməsi barədə razılıq əldə olunmuşdur. 2006-cı ilin sonunadək Avropa, MDB və Baltikyanı ölkələrin enerji sistemlərinin sinxronlaşdırılması məsələsi dəqiqləşdiriləcəkdir. QİƏT ilə Avropa İttifaqı arasında münasibətlərin inkişafı sahəsində səylər davam etdirilir, çünki iştirakçı dövlətlər Avropa İttifaqı ilə əməkdaşlıq haqqında sənədin imzalanmasında maraqlıdır. S.Lavrov təşkilatda bütün region ölkələrinin iştirakını təmin etmək üçün kadr potensialının, habelə QİƏT Katibliyinin işinə nəzarəti gücləndirməyin vacibliyini də diqqətə çatdırmışdır.

QİƏT REGİONAL İNTEQRASİYANIN UĞURLU NÜMUNƏSİDİR

MÜƏLLİFLƏ ƏLAQƏ

Bölmənin digər xəbərləri