SİYASƏT
Qırğız Respublikası Ali Məhkəməsinin Konstitusiya Palatasının nümayəndə heyəti Milli Məclisdə olub
AZƏRTAC xəbər verir ki, görüşdə Ziyafət Əsgərov Azərbaycan və Qırğızıstan arasında əlaqələrin sürətlə inkişaf etdiyini bildirib. Qeyd olunub ki, yüksək səviyyədə baş tutan görüşlər ölkələrimiz arasındakı əməkdaşlığın inkişafı üçün yeni imkanlar açır.
Azərbaycanın və Qırğızıstanın qanunvericilik orqanlarında dostluq qruplarının fəaliyyət göstərdiyini deyən Z.Əsgərov iki ölkə arasında parlamentlərarası əlaqələrin də genişləndiyini diqqətə çatdırıb. Azərbaycanın hüquq sahəsində əldə etdiyi nailiyyətlər barədə qonağa məlumat verən Milli Məclis sədrinin birinci müavini bildirib ki, bu gün ölkəmizdə müxtəlif məhkəmə instansiyaları fəaliyyət göstərir.
Azərbaycanın Avropa İttifaqı ilə yaxından əməkdaşlıq etdiyini vurğulayan Z.Əsgərov ölkəmizdə hüquq sahəsinin Avropa standartlarına uyğunlaşdırıldığını bildirib. Vurğulanıb ki, Azərbaycan Respublikası Konstitusiya Məhkəməsi ilə Qırğız Respublikası Ali Məhkəməsinin Konstitusiya Palatası arasında imzalanmış əməkdaşlıq haqqında memorandum bu sahədə münasibətlərin inkişafına mühüm töhfə verəcək.
Qırğız Respublikası Ali Məhkəməsinin Konstitusiya Palatasının sədri Mukambet Kasımaliyev səfərin ölkələrimiz arasında hüquq sahəsində əlaqələrin genişlənməsinə xidmət etdiyini bildirib. O, memorandumun ölkələrimiz arasında bu istiqamətdə əməkdaşlıq üçün hüquqi baza yaratdığını deyib.
Qonaq ölkəsinin hüquq sistemi barədə ətraflı məlumat verib.